30 di juli ta Dia Mundial Contra Traficacion di Hende

Esaki pa crea conscientisacion riba e necesidad urgente pa combati e crimen aki cu ta kita dignidad y libertad di hende. Riba e dia aki mundo ta uni forsa den solidaridad contra e explotacion di bida humano y ta reafirma e compromiso na husticia y derecho humano. Aruba tin su propio fecha nacional, 18 di october, pa conscientisa nos comunidad riba traficacion di hende, pero ta uni na e esfuersonan mundial pa combati e fenomeno aki.

Aruba ta pasando den diferente reto social, economico, financiero y migratorio. Un aspecto peligroso di e crisis migratorio, ta e fenomeno di traficacion y contrabanda di hende. Traficacion di hende, miho conoci como sclavitud moderno, no mester reconoce como un simpel delito of crimen, pero ta un violacion profundo contra derecho humano y ta responsabilidad di nos tur pa combati esaki. Ta importante pa tin cooperacion internacional, esfuerso di cuerpo policial y legislacion fuerte y un pueblo resiliente pa hunto combati e crimen global aki.

Aruba na luna di juni aña pasa, a haya un evaluacion positivo di US State Department cu a pone Aruba bek na e ranking Tier 2. Esaki ta resultado di esfuersonan di conscientisacion y accionnan haci manera, entre otro, e campaña di conscientisacion "Habri bo Wowo" di Coördinatiecentrum Mensenhandel Mensensmokkel Aruba (CMMA), pa conscientisa comunidad riba e importancia di ta alerta pa cu casonan di traficacion di hende.

Ademas Aruba a haci hopi inversion, a duna sosten y atencion na e departamento of ‘coordinatie punt’, y a haci esfuersonan internacional. Cu e iniciativanan aki, Gobierno ta duna sosten na e victimanan y duna nan e siguransa cu husticia lo atende cu e malhechornan aki debidamente. Gobierno ta haciendo tur esfuerso pa preveni traficacion di hende y percura pa tur hende por biba liber di miedo di explotacion caminda cu husticia ta prevalece pa tur victima di trafico humano.

Prome Minister ta urgi comunidad, pa keda alerta y pa notifica CMMA inmediatamente na momento cu detecta posibel caso di traficacion di hende. Por haci esaki via https://cmmaruba.com/,riba medionan social, cmmaruba of yama e hotline, 5923231 of oficina na 5975223 y via email info@cmmaruba.com.