294 miyon florin na interes den 2025

Durante 2025 Pais Aruba tin e deber di paga 294 miyon florin na interes riba prestamonan existente. Banda di paga 294 miyon florin na interes, lo paga tambe un total di 595 miyon florin como “aflossing” riba debenan, local y internacional den 2025.

Segun e ley di supervision, e debe como parti di e producto interno bruto mester ta 50 porciento den 2040. Pa 2025 ta proyecto cu esaki lo yega un nivel di 67 porciento. Pa por cumpli cu e pagonan na interes y riba debenan, e presupuesto ta e instrumento y cu aprobacion di parlamento pa realisa esaki.

E necesidad financiero of “financieringsbehoefte” ta loke Aruba mester fia riba mercado local y of internacional pa paga debe. E surplus di 1% segun ley y e suma cu mester paga na debe ta determina e necesidad financiero di gobierno. Den e prome cambio di presupuesto 2025 aproba, cu un surplus proyecta di 87.5 miyon florin y un total di 595 miyon florin “aflossing” riba debenan, local y internacional den 2025, gobierno su necesidad financiero ta 508 miyon florin proyecta pa 2025. Di esaki, a  fia un suma di 165 miyon riba mercado local caba na principio di e ana aki. Pa Aruba por fia riba mercado internacional, Rijksministerraad mester aproba e peticion pa Aruba por subi mercado internacional. Den luna di juli Aruba a ricibi aprobacion pa por fia maximo USD 150 miyon riba mercado internacional.

Como cu Aruba no a logra entrega e concepto di rijkswet manera palabra cu Hulanda prome cu 1 di mei 2025, Aruba mester paga un interes di 6.9 porciento enbes di 5.1 porciento riba e “Covid-lening” cu ta nifica Afl. 7 miyon extra tur aña.

E cuadro legal di supervision financiero existente no ta duna Aruba e oportunidad pa presta via Hulanda na un interes mas abao. Segun e presupuesto di Hulanda 2026 , e interes mas halto cu Corsou y Sint Maarten ta paga ta respectivamente 3.1 y 3.0 porciento. Aruba ta pagando entre otro 6.9 porciento riba e “covid-lening” y tin cu fia riba mercado local y internacional na un interes determina pa mercado. Pa refinancia debenan existente, mercado local y internacional ta determinante pa e tasa di interes cu Aruba lo haya. Desaroyonan geopolitico, guera y e posibel impacto di e trade war riba economia mericano ta factornan cu lo por hisa e interes cu e consecuencia cu e suma cu Aruba mester paga na interes ta bira mas grandi. Esaki ta un riesgo existente cu por afecta e finansa publico di Aruba. Como isla chikito nos no tin influencia riba esaki.

Ta un realidad cu supervision financiero ta garantisa disciplina presupuestario pero e no ta facilita pa Aruba por fia na un interes mas abao na Hulanda na e momento aki, manera ta conta pa Corsou y Sint Maarten si. Pero ta un realidad tambe cu si logra haya fia na Hulanda na un interes mas abao y crea mas espacio financiero riba e presupuesto, cu por inverti bek den desaroyo di Aruba y di nos hendenan. Supervision financiero tey y nos mester logra haya mas beneficio pa por financia y implementa nos proprio maneho, maneho cu como isla nos mes ta determina, segun minister di Finansa, Asunto Economico y Sector Primario, segun Geoffrey Wever.