14 aspirante a inicia cu Basisopleiding Penitentiair Inrichtingswerker

Di casi 50 persona cu a aplica pa e formacion, 14 a logra pasa e proceso di seleccion, cu a inicia na april di e aña aki. E formacion aki ta representa un paso importante den e esfuersonan di Gobierno pa fortalece e capacidad di personal di Korrektie Instituut Aruba (KIA) y contribui na un sistema penitenciario mas sigur y professional. 

Segun Minister di Husticia, Integracion, Transporte Publico y Energia, mr. drs. Arthur Dowers , e resultado ta demostra e interes cu tin entre nos hobennan pa contribui na siguridad y husticia na Aruba.

Disciplina, integridad en forsa mental

Minister Dowers ta enfatisa cu e funcion di un trahado di prizon ta uno cu ta exigi disciplina, integridad, responsabilidad y preparacion profesional. E futuro trahadonan lo tin cu opera den un ambiente no facil, caminda nan no solamente tin e responsabilidad pa mantene orden y siguridad, sino tambe pa contribui na un trato humano y profesional di personanan cu a perde nan libertad.

Un di e cosnan mas importante, segun Minister Dowers, ta e integridad di cada aspirante, con nan ta funciona den e instituto manera KIA. "E tentacion ta bay ta hopi grandi, y bosonan ta hopi jong, pero fact ta keda cu bo ta bay topa cu hendenan cu tin hopi experencia y cu ta campeon den manipula hende, y sin cu bo sa, bo por cay den nan gara". Esey ta algo cu cada aspirante mester ta consciente di dje for di momento cu drenta e opleiding. 

Inverti den oersonal nobo

KIA actualmente ta enfrenta retonan significativo, tanto den su infrastructura como den disponibilidad di personal. E cantidad limita di trahadonan ta crea presion adicional riba e funcionamiento diario di e institucion. P'esey ta importante pa continuamente percura pa klasnan nobo pa formacion di personal nobo pa KIA.