Pre-lansamento di documentario "Blue Lizard Effect"

Blue Lizard Effect ta un serie di produccion fascinante di artista internacional Jason Silva, cu a crea e documentario entre e paisahenan magico di Aruba y cu lo estrena dia 17 di april na Warner Channel, TNT, Discovery y MAX.

E serie di documentario aki ta mustra e 4 elementonan cu ta aire, candela, awa y tera cu nos isla ta ofrece na nos localnan y bishitantenan. A traves di cinematografia ta conta historia den forma
impresionante, cu lo transporta tur cu mir’e, riba un biahe unico. E documentario ta invita nos
bishitantenan pa explora tur loke nos isla ta ofrece y duna nan e oportunidad pa experiencia e magia cu ta haci Aruba un destinacion unico.

Segun Minister di Turismo y Salud Publico sr. Dangui Oduber, cu a atende e pre-lansamento, e ta un orguyo pa experiencia un produccion di un nivel asina halto cu ta promove Aruba como un destinacion bunita y cu hopi hospitalidad. 
Minister Dangui Oduber ta felicita e productor Jason Silva y ful e ekipo di ATA pa nan dedicacion y compromiso pa promove Aruba como e destinacion di “Un Isla Feliz”.