ORANJESTAD - Na 2016, Asamblea General di Nacionnan Uni a decreta 22 di april como dia Internacional di Mama Tera. 

Riba e fecha aki ta reconoce e ecosistemanan di e planeta Tera, cu ta e luga di biba di humanidad y cu ta rekeri proteccion pa engrandece nos bienestar, combati cambio di clima y stop e perdida di biodiversidad. Dia Internacional di Mama Tera ta sirbi pa un
comienso y direccion di accion colectivo significante pa proteccion di nos planeta y crea un
futuro sostenibel.

Cambio di clima, cambio den naturalesa ocasiona pa hende, falta di ekilibrio den e biodiversidad manera kapmento of rosamento di mondi, cambio di uzo di tera, agricultura y produccion di cria di bestia intensivo y comercio ilegal di bestia salvahe, ta acelerando e destruccion di planeta.

Riba dia di Mama Tera ta pone enfasis riba e accion necesario pa haci cambio pa ta mas sostenibel y move rapidamente pa un economia circular y sostenibel cu ta funciona miho pa hende y e planeta. Proteccion di e planeta ta responsabilidad di un y tur. 
E dia aki ta pa encurasha hende pa haci miho pa e planeta, pa tuma accion pa alivia e planeta di tanto daño y compromete na un ambiente limpi y mas berde.
Nos mester cuida e planeta fascinante cu nos ta habita mas, y esaki ta e oportunidad cu nos ta haya pa engrandece nos conocemento y siña con nos planeta a yega na existi y e daño cu humanidad ta haciendo.

Formulacion di maneho cu ta compromete na proteccion di medio ambiente ta di sumo importancia. Esaki ta e motibo di e recien bishita di consulta cu TwyndraGudee hunto cu diferente ‘stakeholders’ pa yega na e National Biodiversity Strategic Accion Plan (NBSAP) en corto e Nature Policy. Directie Natuur en Milieu (DNM), hunto cu TwyndraGudee lo formula e maneho pa e siguiente seis aña. Na juni proximo, DNM ta prepara hunto cu Hulanda pa bay reunionnan di COP18, en conexion cu e Convention of Biological Diversity.

Comunidad tin un rol importante den conservacion di nos planeta, y por contribui plantando mata, teniendo accion di limpiesa y encuentro di trabou educativo.
Cada un di nos por tuma e reto y adopta practicanan den bida diario pa reduci
desperdicio, conserva energia y scoge productonan cu ta "eco-friendly.