Centro di Bario Lago Heights awo ofreciendo mas actividad na comunidad

E proyecto ta consisti di un drechamento di e cancha di basketball, un leslokaal nobo pa programanan di arte y un skatepark, pa ofrece e hobennan di e area mas actividad sano.

E inversionnan aki ta danki na companianan local manera C-Mart, Palm Tours, Superfood, Aruba Convention Bureau como tambe organisacionnan manera A.T.A. y CEDE Aruba. Ademas a ricibi inversion internacional for di e compania Edmentum.

E ceremonia oficial  a cuminsa cu cortamento di cinta door di Minister di Husticia y Asunto Social sr. Rocco Tjon.

90 boluntario di Merca a bin Aruba pa ehecuta e proyecto aki. Na 2022, Gobierno di Aruba a introduci e proyecto di Veilige Bario’s, y a scoge pa ehecuta esaki hunto cu otro partners, pa cual motibo a colabora cu CEDE Aruba. Ya caba tin mucho mas movecion den algun centronan di bario. Tambe tin mucho mas personal y mas fondo cu ta aloca na e centronan di bario por organisa mas actividad pa e hobennan di e diferente barionan na Aruba.

E inversion ta importante pa cada bario, door di brinda oportunidad pa participa na actividadnan cu ta di balor agrega na nan mesun desaroyo, y di e mesun forma ta percura pa nan ta menos riba caya.