Klein vaarbewijs

Si bo kier fungi como capitan di un boto of barco, segun articulo 3 di Landsbesluit Openbare Wateren en Stranden bo mester tin un vaarbewijs valido. Articulo 3 di e Landsbesluit Openbare Wateren en Stranden ta prohibi pa fungi como capitan di un boto of barco si bo no tin un vaarbewijs valido. Na Aruba ta otorga dos sorto di vaarbewijs: klein vaarbewijs of groot vaarbewijs.

Klein vaarbewijs ta valido pa nabega cu:

  • Boto di motor cu un largura di 12 te cu 20 metro, cu excepcion di touwboot (tug boat) y boto cu ta uza comercialmente pa transporta producto pa un compania, cu tin un capacidad di carga di 15 ton of mas of cu ta uza comercialmente pa transporta un of mas pasahero;
  • Boto di motor rapido cu no ta ser uza den combinacion cu waterski (Ski di awa).

Groot vaarbewijs ta valido pa nabega cu tur boto of barco, tanten cu nan no ta cay bou di e Ley Hulandes pa diploma di nabegacion maritimo (Nederlandse Wet op de zeevaartdiploma's 1935 (Stb. 456) y e ley Hulandes pa nabegacion di pesca riba lama (Nederlandse Wet op de zeevisvaart diploma's 1935 (Stb. 455).))

Pa por haya un asina yama Klein vaarbewijs, mester tin e diploma “Klein vaarbewijs y por sigui e curso aki na Enseñansa pa Empleo. Articulo 4 di e Landsbesluit Openbare wateren en Stranden  ta menciona caso di excepcion pa loke ta trata un vaarbewijs. Un vaarbewijs no ta necesario si:

  • Ta uza e boto of barco exclusivamente of principalmente pa nabegacion maritimo pa y for di destinacion pafo di Aruba y e capitan tin un diploma di nabegacion maritimo y di nabegacion di pesca riba lama;
  • Ta move e boto solamente uzando forsa bruto/musculo;
  • Ta uza e boto of barco unicamente como un luga pa biba;
  • E boto ta pertenece na categoria di jetski, waterscooter y lo demas cu no ta ser uza den combinacion cu waterski.
Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options