Supervision di Enseñansa

Inspeccion ta e organo di control y di conseho pa Ministro di Enseñansa. Control riba enseñansa ta na encargo di Minister di Enseñansa. Seccion di Inspeccion ta consisti di inspectornan pa enseñansa primario, enseñansa general avansa y enseñansa profesional. Apesar cu tin diferente tipo di enseñansa, e punto di salida di Inspeccion ta cu trabou di control di inspectornan ta riba un solo liña y cu mester haci’e segun e “Toezichtkader” (cuadro di control). Esaki ta nifica cu tur inspector por reemplasa otro.

Pa Gobierno cu ta subsidia scolnan na Aruba, ta importante cu e calidad di enseñansa na  scolnan ta cumpli cu cierto normanan. Enseñansa mester ta organisa na un manera efectivo y eficiente pa garantisa cu e resultadonan ta cumpli cu e metanan proponi y cu nan ta cumpli cu e espectativanan di sociedad.

Inspeccion ta vigila pa realisacion di suficiente tempo pa enseñansa y siñamento manera ta prescribi segun reglamento. Pa loke ta concerni prestacion, tempo pa enseñansa y siñamento ta condicion importante. Un bon garantia di suficiente tempo pa enseñansa y siñamento no solamente ta duna un contribucion esencial na e prestacion di e alumnonan, pero tambe e ta na beneficio di e funcion social di enseñansa.

Inspeccion ta responsabel pa e control ariba enseñansa y den e cuadro ey Inspeccion ta controla riba cumplimento di e reglamentonan legal. Ta trata aki di e responsabilidad di e directivanan di scol y nan lidernan, oferta pa enseñansa conforme e plannan di enseñansa stipula y metanan, rooster di les, registracion di alumno, maestro y oranan di les y tarea, examen, reglamento di scol, promocion y kitamento di alumno y establecimento di  enseñansa.

Ley ta bisa cu solamente personanan cu un prueba di capacidad manera describi den ley ta competente pa haya un nombramento den enseñansa. Den ley ta poni tambe cu minister por vincula otro pruebanan di capacidad y competencia pa por duna les sea den enseñansa preparatorio of enseñansa basico.

Por sosode cu diferente persona cu ta envolvi den enseñansa no ta contento cu un of otro desaroyo. Esaki por trece cun’e cu e Inspeccion por haya keho durante aña escolar. Kehonan por bin di mayor, maestro, cabesante of directiva di scol.