Instituto Medico San Nicolas (ImSan)

Instituto Medico San Nicolas (ImSan)
Instituto Medico San Nicolas (ImSan) ta un centro medico pa tratamento ambulante, situa den e districto di San Nicolas. Tin un filial cu servicio limita situa na Wayaca. Por lo general ta manda pashent cu mester wordo interna pa hospital. Actualmente ImSan ta brinda e siguiente servicionan:

• Un hospital di 22 camber pa estadianan corto
• Servicio di emergencia: habri 24 ora pa dia pa duna asistencia medico urgente. Tambe tin un camber di parto unda dunamento di luz por tuma luga;
• Servicio di dokter di cas; Despues di ora di oficina, den fin di siman y riba dia di fiesta tin un dokter na warda presente pa por trata problema chikito di salud, cu no por warda riba consulta di dokter di cas propio;
• Centro di diabetes: Aki pashent di diabetes por acudi pa tratamento door di un enfermera(o) specialisa den diabetes, terapista pa pia, dietista, asistente pa casonan di herida y specialista medico;
• Policlinica: dos dokter di cas, un dokter di wowo, un cardiologo, un ciruhano y dos partera cu diariamente tin consulta riba cita na ImSan. Tambe policlinica ta ofrece un balie pa duna asistencia na adictonan y un poli pa trata herida;
• Kantoor di AZV: pa e pueblo di San Nicolas y vecindario tin un filial di AZV unda ta brinda servicio na cliente;
• Laboratorio Nacional: den ImSan tin un laboratorio y luga unda ta saca sanger tanto planea of urgente (prikpost);
• Departamento di radiografia; Por saca potret di radiografia tanto planea of urgente na ImSan durante e orario stipula;
• Servicio di ambulance: ImSan ta e unico servicio di ambulance na Aruba cu ta dispone di shete ambulance completamente ekipa cu for di dos post ta duna asistencia urgente y tambe planea. Den ambulance tin presente enfermera(o) di ambulance y e chauffeur di ambulance;
• Organisacion di training: ImSan tin diferente licencia pa duna cursonan reconoci riba tereno di asistencia den caso di emergencia, reanimacion y asistencia di ambulance. Tambe den cooperacion cu Vrije Universiteit Amsterdam, ta educa dokter di cas via ImSan;
• Asistencia durante desastre: ImSan  ta dispone di tres container cu material di desastre y recursonan pa den caso di un desastre por duna asistencia medico na un grupo grandi di victima.;
• Air Ambulance: ImSam ta pone 24ora pa dia team special y ekipo medico disponibel pa e air ambulance di Tiara Air;
• Servicio di dokter mobil: dokter riba call pa duna cuido medico simpel  na turista cu ta keda na Aruba, ora cu tin mester.