Matrimonio

Tur persona cu kier casa, mester duna esaki di conoce na Censo y Registro Civil (burgerlijke stand), e asina yama dunamento di man.
Despues di diescuatro dia cu a duna man (a registra na Censo e intencion di matrimonio) e casamento por tuma luga (articulo 62 insiso 1 BWA).

Aruba a bira un luga ideal pa parehanan casa door di su ambiente romantico, idilico y e manera relaha di bida. Aruba ta un di e destinacionnan faborito den mundo pa casa. Hulandes y stranhero por casa na Aruba, aunke cu nan no ta inscribi na censo di Aruba.
Si bo tin plan pa casa na Aruba, bo mester cuminsa prepara na tempo. Tin formulario y/of documento cu mester ta entrega na tempo na e Oficina di Censo di Aruba. Tambe mester tene cuenta cu e terminonan legal vigente cu tin na Aruba.