Matrimonio pa esnan cu no ta biba na Aruba

Aruba a bira un luga ideal pa parehanan casa door di su ambiente romantico, idilico y e manera relaha di bida. Aruba ta un di e destinacionnan faborito den mundo pa casa. Hulandes y stranhero por casa na Aruba, aunke cu nan no ta inscribi na censo di Aruba.
Si bo tin plan pa casa na Aruba, bo mester cuminsa prepara na tempo. Tin formulario y/of documento cu mester ta entrega na tempo na e Oficina di Censo di Aruba. Tambe mester tene cuenta cu e terminonan legal vigente cu tin na Aruba.

Por scoge un fecha di matrimonio ora haya confirmacion di Censo cu nan a ricibi tur e documentonan necesario.

Si cumpli cu tur e condicionnan, abo y bo pareha lo experiencia e dia di boso matrimonio na un manera unico y inolvidabel. Hopi pareha cu a casa na Aruba ta bin bek Aruba pa celebra e fecha aki y pa renoba nan votonan matrimonial. Esaki ta un muestra cu casamento na Aruba ta hopi special y unico.

Duna man(duna di conoce cu kier contrae matrimonio)

Tur persona cu kier casa na Aruba mester duna esaki di conoce na un ambtenar di Censo/Registro Civil na Aruba, cu nan ta pensa di casa (duna man).

Ta posibel, aunke cu e pareha no ta inscribi na Censo di Aruba, pa duna man por escrito. Por haci esaki dor di yena y manda e formulario di duna man (ondertrouwformulier) pa Censo/Registro Civil na Aruba.

Hunto cu e formulario mester manda e siguiente documentonan:

  1. Identificacion valido (paspoort) original y copia;
  2. Si bo ta naci den Reino Hulandes, un uittreksel (extracto) di acta di nacemento di tur dos;
  3. Pa esnan naci na un otro pais p.e. Venezuela, Surnam, Colombia, etc., e acta original di nacemento mester tin un apostilla di Ministerio di Relacionnen Exterior di dicho pais. Pa esnan naci na Republica Dominicana, e acta original di nacemento mester tin tambe un seyo di verificacion di Embahada Hulandes na dicho pais. Haiti no mester apostilla pero si un seyo di verificacion di Embahada Hulandes na e pais menciona;
  4. Si un di e prometidonan of tur dos tabata casa caba, mester di un prueba cu a disolve e matrimonio anterior. Esaki por ta: extracto (uittreksel) di e acta di divorcio of fayecimento, pa algun pais ta rekeri e sentencia di divorcio y un declaracion manera menciona bou no. 5. E acta di exterior mester tin un apostilla of/y seyo di Embahada Hulandes;
  5. Un declaracion cu tur dos persona no ta casa, traha door di un notario of door di un empleado di Censo di e luga unda e pareha ta biba ultimo. Pa declaracion traha pafo di Reino Hulandes, mester apostilla di Ministerio di Relacionnan Exterior y/of legalisacion di embahada Hulandes ;
  6. Copia di paspoort valido di por lo menos dos testigo of un maximo di cuater testigo;
  7. Un lista cu nomber y adres completo di e testigonan.

E formulario hunto cu e documentonan rekeri, mester ta entrega no mas tarda cu un (1) luna prome cu e fecha di matrimonio, pa verificacion na Oficina di Censo y Registro Civil (Dienst Burgerlijke Stand en Bevolkingsregister) di Aruba. Tambe por manda e formulario hunto cu e documentonan pa medio di e-mail na: info@censo.aw.

Ora yega Aruba mester entrega e documentonan original na e empleado di Censo y Registro Civil y mester paga e gasto di matrimonio,

Diescuatro (14) dia despues cu a duna man (duna di conoce cu kier contrae matrimonio) of diescuatro dia despues cu Censo di Aruba a ricibi e formulario di duna man, e matrimonio por tuma luga.

Ceremonia di matrimonio

Pa contrae matrimonio ta exigi cu:

  • Homber y muhe mester tin diesocho aña;
  • Personanan bou di diesocho aña (menor di edad ) no por contrae matrimonio sin permiso di e mayornan, tambe;
  • Si e persona (nan) ta bou di tutela (te cu diesocho aña), anto mester di consentimento di e voogd y di e di dos voogd;
  • Ora di contrae matrimonio mester ta presente, minimo dos (2) y maximo cuatro (4) testigo cu ta mayor di edad.

Pa un matrimonio civil (casamento pa raad) door di personanan cu no ta inscribi na Censo di Aruba, ta conta ademas e siguiente reglanan:

  • Tur ceremonia civil/legal mester tuma luga den stadhuis;
  • E matrimonio por tuma luga di dialuna pa diabierna entre 10 or y 12 or di mainta;
  • Riba peticion, cu pago adicional, por casa den oranan di atardi of riba diasabra.

Na final di e ceremonia di matrimonio e pareha ta haya for di man di e empleado di Censo/Registro Civil, e asina yama trouwboek (buki di matrimonio). Esaki ta un prueba cu e matrimonio a tuma luga.

Ta recomenda pa pidi un of mas extracto di e acta di matrimonio (uittreksel di e huwelijksakte). Mester di e extracto  pa entre otro laga registra e matrimonio na e pais na unda e pareha ta biba y/of si ta bay casa pa iglesia, pa mustra e autoridadnan di iglesia.

Gasto

E gastonan di ceremonia di matrimonio ta:

  • Di dialuna pa diabierna :  Awg. 130,00 (alrededor di US$ 80,00);
  • Trouwboek: Awg.55,00 US$ (alrededor di $ 32,00).

Matrimonio na misa

Despues di e matrimonio civil (casamento pa raad) e pareha recien casa, por casa pa misa na Aruba (laga bendiciona nan matrimonio). E casamento pa misa por tuma luga segun e siguiente religionnan:

  • Catolico Romano;
  • Protestant, Anglicano of Metodista;
  • Hudiu.


Si ta desea pa casa pa misa segun e religion Catolico Romano, mester di e siguiente documentonan:

  • Un prueba cu e pareha a asisti na un preparacion prematrimonial;
  • Un permiso por escrito di e religioso (pastor of pader) di e pareha, pa nan por casa na Aruba;
  • E pastor di e pareha mester duna un declaracion oficial, cu e pareha no tabata casa prome caba pa misa;
  • Un copia di e prueba di matrimonio civil, na Aruba of di e pais unda nan ta biba of un uittreksel (extracto) di e acta di matrimonio;
  • Prueba di bautismo y di confirmacion di e pareha;
  • Copia di paspoort of otro documento di identificacion di e pareha;
  • Un lista cu nomber y adres di e testigonan.

Tur documento mester ta entrega cuatro luna prome cu e fecha di matrimonio.
E ceremonia di matrimonio mester tuma luga den un misa Catolico Romano.

Mester tene na cuenta si, cu actualmente ta revisa e exigencianan manera ariba menciona.

Ta bon pa busca informacion na:

  • Centro Pastoral Aruba, Santa Cruz 35 B, telefon (297) 585 5985, Fax: (297) 585 1585;
  • Pastorie di Misa San Fransisco, Irausquinplein 3, Oranjestad, telefon (297) 582 1434;
  • Pastorie di Misa Santa Ana, Noord 16, Oranjestad, telefon (297) 587 1409, Fax: (297) 587 8554.

Si ta desea di laga bendiciona e matrimonio segun e religion Protestant, Anglicano of Metodista, e siguiente reglanan ta conta:

  1. E ceremonia di matrimonio por tuma luga den un di e misanan Protestant, Anglicano of Metodista na Aruba of e pareha por scohe un lugar di nan preferencia;
  2. Un copia di e prueba di matrimonio civil, na Aruba of di e pais unda nan ta biba of un uittreksel (extracto) di e acta di matrimonio.

Pa mas informacion por tuma contacto cu:

  • Iglesia Protestant, Wilhelminastraat1, Oranjestad, telefon (297) 582 1435, e-mail: protestantsegemeente@setarnet.aw, website: www.pgva.org;
  • Iglesia Anglicano, Weg Sero Preto 31, San Nicolas, telefon (297) 5845142 of (297) 584 3394;
  • Iglesia Metodista, Longfellowstraat 3, Oranjestad, adres di corespondencia:Postbus 2149, San Nicolas, Telefon/fax (297) 584 5243, e-mail: arubamethch@setarnet.aw.

Si ta desea pa laga bendiciona e matrimonio segun e religion Hudiu, e siguiente reglanan ta entre otro aplicabel:

  • Tur dos persona mester ta Hudiu. Nan mester entrega un verificacion di e rabino di e luga unda nan ta biba cu nan ta Hudiu, na e comunidad Hudiu di Aruba;
  • Mester  entrega un peticion formal na e comunidad Hudiu di Aruba;
  • E cantor di Aruba ta acepta comprobante di ta Hudiu for di autoridadnan Ortodoxo, Conservativo, Reformista, Liberal y Reconstruccionista;
  • E snoa di Aruba ta un congregacion conservativo reformista independiente;
  • E ceremonia di matrimonio por tuma luga den e snoa of na un otro luga cu e pareha ta desea.

Pa mas informacion por tuma contacto cu Beth Israël, Adriaan Laclé Boulevard 2, Oranjestad. Telefon (297) 588 6228, Fax (297) 588 6264.

Pa tur bendicion religioso ta rekeri cu e pareha mester ta bisti na un manera apropia. Esaki ta encera cu no ta permiti pa e bruid bisti trahe di baño of saya lora na curpa (pareo). E bruidegom por bisti un short.

Pa bendicionamento di matrimonio, iglesianan por pidi un contribucion of ta aprecia un donacion. Pa mas informacion tocante di esaki por tuma contacto cu e autoridad di iglesia corespondiente.

Pa casa riba lama, ta rekeri lo siguiente:

Capitan di un barco no ta autorisa pa ehecuta un ceremonia di matrimonio segun e leynan di Hulanda y/of di Aruba. E regla aki ta conta pa matrimonio riba awanan internacional y den hafnan. E unico excepcion riba e regla aki ta, si e capitan di e barco ta autorisa pa haci tal door di e pais bou cua bandera e barco ta nabega y ta registra.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options