Abogado liber / Pro-deo

Den bida bo por haya bo mes envolvi den problema huridico/legal. Por ehempel:

  • cancelamento sin motibo di contrato di huur di apartamento of cas den cual bo ta biba;
  • bo a perde bo trabao y bo no por yega na un solucion rasonabel;
  • bo ta bay divorcia.

Den caso cu bo mester di asistencia huridico y bo no tin suficiente recurso economico (placa), bo por haci uzo di areglo di abogado liber (asistencia huridico liber). Bo mes por calcula si bo ta bin na remarca pa abogado liber. Bo tin cu tene cuenta si cu Corte di Husticia ta traha cu termino. Pesey, haci bo peticion na tempo y haci un cita adelanta.

Peticion pa Asistencia Huridico Liber

Si bo kier haci uzo di abogado liber bo tin cu haci un cita cu e seccion di Asistencia Huridico liber di Departamento di Asunto Social. Tambe bo tin cu busca un formulario di KRB (Kosteloze Rechtskundige Bijstand) na Registro Civil (Censo). Cu e formulario aki bo mester busca un Declaracion di Entrada (Inkomensverklaring) na Departamento di Impuesto. Corda cu bo tin cu bay cu tur dos formulario na momento di e cita cu Departamento di Asunto Social.

Evaluacion di peticion

E seccion di Asistencia Huridico liber di Departamento di Asunto Social  lo evalua bo peticion pa abogado liber segun e siguiente criterianan:

  • Tur persona cu ta inscribi na Censo, sea di nacionalidad Hulandes of di otro nacionalidad cu ta residencia na Aruba, por bin na remarca pa haya asistencia huridico paga door di gobierno.
  • Den caso di conflicto entre persona y/of organisacion (casonan civil) manera; conflicto di labor, divorcio of peticion pa pone bou di curatela, un persona por haci un peticion pa abogado liber. Tambe ora tin cu presenta dilanti hues pa un acto castigabel (casonan Penal) manera, pasa den lus cora of ladronicia, por pidi pa abogado liber. No ta haya abogado liber pa casonan administrativo (LAR-, SVB- of casonan di bijstand). Den cierto caso personal di e seccion di Asistencia Huridico mes lo por duna asistencia huridico.
  • Na prome luga ta bay wak bo entrada of capital pa medio di por ehempel bo slip di salario y bo declaracion di entrada pa evalua si berdad bo ta un persona sin of cu tiki recurso. Pa bo haya un abogado liber den caso di un conflicto di labor, bo entrada no por ta mas cu AWG. 1250,00. Pa tur otro caso e entrada di bo y di bo famia no por ta mas cu e salario minimo actual. Ademas di bo entrada, ta evalua tambe e contenido di e caso. Si ta trata di un conflicto di labor, bo mester bay Departamento di Asunto Social  prome. Si Departamento di Labor no por yega na un solucion rasonabel y bo tin un bon base pa bringa bo caso dilanti hues, e ora ey lo bo por haci un peticion pa un abogado liber.
  • Si honra bo peticion, bo ta haya di Departamento di Asunto Social un carchi di Abogado Liber(KRB-kaart).

Bo tin cu tene cuenta si cu, Departamento di Asunto Social no ta duna carchi pa abogado liber cu forsa retroactivo. Cada ciudadano por scohe su mesun abogado, basta cu esaki acepta bo caso.

Keho

Si a rechasa bo peticion, bo por entrega un keho.

Rechaso pa motibonan financiero:

Den caso cu bo entrada ta mas halto cu e limite menciona y bo situacion economico no ta permiti bo di paga un abogado, e seccion di Abogado Liber por yudabo traha un peticion, pa toch bo haya un carchi pa abogado liber, dirigi na minister encarga cu Asunto Social. E minister concerni, conforme su maneho, por tuma otro decision tocante bo situacion financiero y toch otorga bo un carchi pa abogado liber. Si bo no ta di acuerdo cu e rechaso di Departamento di Asunto Social, bo por manda un carta na minister di Husticia  pa medio di e minister encarga cu Asunto Social.

Rechaso pa motibo di contenido di e caso:

Si bo no ta di acuerdo cu e decision aki, e ora ey bo no ta dirigi bo mes na e minister encarga cu Asunto Social. Dentro di seis (6)siman despues di e fecha di decision, bo por entrega un keho motiva por escrito (bezwaarschrift). E keho aki ta un carta den cual bo ta duna e motibo dicon bo no ta di acuerdo cu a rechasa bo peticion. E keho bo tin cu entrega na Departamento di Asunto Social cu un copia na Secretariado di e Comision di Keho LAR (Bezwaarcommissie LAR).

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options