Aruba ta celebra dia di San Huan (Dera Gay)

Fiesta cultural di San Huan (Huan Bautista) den boca di pueblo yama Dera Gay ta data desde aña 1862 y ta celebr’e tur aña riba 24 juni.

Tanto gobierno como organisacionnan cultural particular ta haci e preparacionnan necesario pa e fiesta cultural riba 24 juni proximo, e dia di San Huan Bautista y e deramento di gay. Tin varios storia tocante origen di e fiesta religioso y cultural di pueblo.

Origen religioso ta relaciona cu fecha di nacemento di San Huan Bautista. Origen cultural ta mustra riba e fiesta di cosecha. Aunke Dera Gay ta mas tanto conoci como un fiesta cultural cu entre otro musica, baile y canto. Colornan cu ta domina ta cora y geel.  Geel ta simbolisa e palo di Kibrahacha cu ta floria y cora como simbolo di candela cu ta cende riba e anochi prome pa anuncia e fiesta di e siguiente dia.

Segun tradicion e fiesta ta cuminsa dia 23 di juni ora cu e cunukeronan ta cende sobra di palo di maishi na candela y p’asina cuminsa prepara pa e temporada nobo di cosecha. E cendemento di candela ta manera un limpiesa pa despues pa cuminsa di nobo.

Dia 24 di juni, despues di bahada di solo, e fiesta di San Huan ta cuminsa den diferente districto cu baile di Dera Gay, baile di bula candela y baile di bandera. E baile di candela ta pa proteccion contra malesa y mala suerte. E baile mas conoci t’esun di Dera Gay, unda e hende homber cu su wowo tapa y c’un palo den su man mester purba mata e gay. Antes e bailamento aki ta tuma luga den sabana cu un gay bibo dera. Awendia ta uza sea un gay traha y e baile ta den club. Esnan cu ta baila ainda den sabana of riba veld di tera ta uza un calbas.

Tambe tin un baile di bandera, unda ta pone diferente banderin den suela y un persona cu wowo tapa cu lenso ta busca e banderinnan. Ceremonia ta acompaña pa musica y cantica folklorico. E instrumentonan musical cu ta resalta ta violin, wiri y tambu. E cantica ta data desde 1862. Tambe tin hopi cuminda y bebida durante e celebracion aki.

Henter e baile ta tuma luga bou tocamento y cantamento di e cantica di San Huan. E instrumentonan musical mas uza ta fio, wiri, raspa y tambu. E cantica ta conoci for di 1862. Cuminda y bebida na abundancia tambe ta  parti di e fiesta.

E fiesta di San Huan y Dera Gay a bira hopi popular atrobe despues di añanan setenta bou di poblacion local como tambe na e scol ta duna atencion na e fiesta popular aki.

Adhunto por haya e calendario di actividad pa Dia di San Huan:

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options