Urna Electoral (Districto Electoral)

Cada urna electoral ta consisti di tres miembro, di cua un ta e presidente. E presidente ta e prome miembro di e urna electoral y entre e dos otro miembronan ta nombra un como e segundo y un como e di tres miembro di e urna electoral. Ademas ta nombra tambe dos miembro suplente. Ministro di Asunto General ta nombra e miembronan.

E urna electoral ta practicamente encarga cu e proceso electoral den nan propio districto electoral. Ademas nan ta responsabel pa un aplicacion corecto di e articulonan di e ley electoral. Tambe ta  responsabilidad di e presidente di e urna electoral pa mantene  ordo den e stemlokaal y pa percura cu cada votado por eherce su derecho di voto den tur trankilidad. E presidente tambe ta responsabel pa determina e resultado di votacion den su propio urna electoral y informa  hoofdstembureau di e resultado aki.

Districto Electoral

Den un decreto nacional a reparti Aruba pa e eleccion aki den 59 districto electoral, cu cada un cu nan mesun urna electoral y ademas e urna electoralnan special A y B. Un districto electoral ta un teritorio den cual ta tene un votacion. Generalmente tin den cada districto electoral maximalmente 1.200 votador. E aña aki a aumenta e catidad te 1.500 votador.

Stemlokaal

Den cada districto electoral ta asigna un stemlokaal adecua. E votador ta vota den e stemlokaal asigna na su districto electoral. E stemlokaal ta e luga unda e urna electoral ta estableci. E stemlokaal ta diseña di tal forma cu e secreto di voto ta garantisa. Tin un mesa pa e miembronan di e urna electoral cu ta situa di tal manera cu votadornan por wak kico e miembronan ta haci. Riba e mesa tin un lista di votador cu mag di vota na e urna electoral ey, como tambe un copia di e ley electoral y e decretonan cu ta regarda eleccion.

Urna/Stembus

Den e stemlokaal tin un urna di metal color shinishi, dilanti of cerca di e mesa di e stembureau y na alcance di e tercer miembro di e stembureau y na alcanse di e miembro di e stembureau cu ta vigila e stembus. Prome cu e votacion cuminsa e miembronan di e districto electoral ta controla si e urna(stembus) ta bashi y despues ta cera/seya esaki.

Hoki pa vota

Den e urna electoral tin un of mas hoki di vota.  E hoki ta di tal forma cu un otro hende no por wak con un persona ta vota. Esaki ta importante, pasobra votamento ta secreto. Ningun hende tin e obligacion di bisa pa kende el a vota.
Tocante e hoki di vota articulo 49 inciso 3 di e ley electoral ta bisa lo siguiente:

  • Den e hoki di vota tin un lessenaar cu un altura di por lo menos 90 centimeter. Cada banda di e lessenaar tin dos scot intransparente cu un altura di por lo menos di 110 centimeter y un hanchura di por lo menos 100 centimeter. Banda patras di e lessenaar tin un scot tambe intransparente cu un altura di por lo 50 centimeter y cu ariba dje un scot intransparente cu ta tapa henter e lessenaar y cu tin un profundidad di por lo menos 20 centimeter. E hoki di vota ta wordo tapa dilanti cu cortina di paña preto intransparante te cu e altura di e lessenaar.

Stembiljet - tarheta electoral

Riba e stembiljet tin menciona tur lista di e partidonan politico cu a entrega nan lista di candidato riba e dia di entregamento di lista y cu e lista a keda aproba (declara valido).  Riba cada lista ta aparece nomber di e candidatonan di e partido. Dilanti cada candidato tin un hoki chiquito y e votador ta vota door di kleur e ronchi dilanti di nomber di e candidato ariba su lista preferi cora.  

Manual pa presidente y miembronan di urnanan electoral

Den e manual (na Hulandes) aki por haya mas informacion tocante e proceso.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki