Wingo y Sarpa ta agrega tercer frecuencia semanal den juni 2022

ORANJESTAD – Aruba Airport Authority N.V. (AAA) ta contento pa comparti informacion tocante su mercado cu mas liher ta creciendo: Latino America.

Aerolineanan Latino Americano Wingo y Sarpa recientemente a informa tocante nan plannan pa agrega vuelonan adicional na nan itinerarionan semanal cuminsando 7 di juni pa Wingo y 21 di juni pa Sarpa.

Aeropuerto Internacional Reina Beatrix (AUA Airport) actualmente tin un total di 4 aerolinea Latino Americano (Avianca, Copa Airlines, Wingo y Sarpa) cu ta ofrece servicio directo pa Colombia (Bogota, Medellin y Barranquilla) y Panama. Como destinacion Aruba tin 20 vuelo semanal for di e region Latino Americano di cual 13 ta vuelo semanal for di Colombia so (compara cu 16 vuelo semanal na 2019). E mercado Latino Americano ta conta pa 8% di market share di AUA Airport su distribucion total di trafico.

Avion Wingo y Sarpa  Desde diamars 7 di juni, 2022, Wingo ta ofrece 3 servicio directo semanal for di Bogota, cu ta nifica un buelo extra semanal na su 2 vuelo programa riba diahuebs y diadomingo. Wingo awo a agrega un buelo riba diamars. Copa su subsidiario “low-cost” ta uza e avion tipo 737-800 cu 186 vuelo pa e vuelo adicional aki, cu ta traduci den un aumento di 50% den e capacidad di asiento semanal (for di 372 pa 558 asiento).

Despues di cuminsa cu servicio comercial pa Aruba na januari 2022 (2 servicio semanal riba diaranson y diadomingo), Sarpa ta cla pa ofrece servicio adicional tambe desde diamars, 21 di juni 2022 pa Aruba. Esaki lo nifica un tercer vuelo directo semanal riba e ruta Medellin - Aruba abordo di e avion Embraer 145 di 50 asiento. Lo adapta e operacionnan aki pa opera riba diamars, diahuebs y diadomingo.

“Cu e vuelonan adicional aki sigura pa AUA Airport, tanto e mercadonan Latino Americano y esun local lo beneficia grandemente. Avianca tambe a agrega 2 servicio semanal pa e periodo di 22 di mei pa 19 di juni, 2022, demostrando e confiansa continuo den nos destinacion. Nos semper ta activamente y continuamente en busca pa atrae servicio nobo pa AUA Airport y e contesta for di nos aerolineanan partner ta un reconocimento cu nos esfuersonan ta den e direccion corecto. Nos ta agradecido y ta celebra tur servicio nobo cu hopi smaak!” asina Air Service Development Manager Jo-Anne Arends a bisa den nomber di e ekipo completo di AAA.

Pa mas informacion y pa reserva pasashi pa cualkier di e vuelonan aki por bishita WWW.WINGO.COM y WWW.SARPA.COM.CO.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options