Webinar organisa door di IDEA pa hende muhe

ORANJESTAD – Departamento di Asuntonan Economico, Comercio y Industria (DEACI) mediante su unit di Iniciativa pa Desaroyo di Empresa Arubano (IDEA) cu colaboracion di Vadavas Jewerly, Accessories & More, a organisa su di tercer webinar di Women Entrepreneurship cu e topico di “Aspiring Women Entrepreneurship” riba 10 november ultimo.

Durante aña IDEA cu colaboracion di Erasmus Consulting & Training y ActionCOACH a organisa dos webinar pa e grupo femenino. E webinarnan aki ta specialmente dedica pa e grupo aki cu ta desea flexibilidad den nan bida, cu ta desea di sigui nan pasion, cu kier tin mas control riba nan futuro y ta desea di crece mas rapido den nan carera.

Srta. Valeria Gomez, presentado di Webinar Aspiring Women Entrepreneurship y Loella Croes di Idea.Srta. Valeria Gomez, presentado di Webinar Aspiring Women Entrepreneurship.Diferente tips valioso e di tercer webinar a contene. Srta. Valeria Gomez, presentadora di e webinar, a menciona pa no busca excusa pa evita cuminsa bo negoshi y kere den bo idea y bo soño. Idea y soño ta algo cu e persona tin den su mes y mester kere den dje y haci’e un realidad. Hopi biaha e excusa ta stroba  bo pa ta exitoso den futuro. Tur cos tin nan proceso pa na final por ta exitoso. Valeria ta un empresario femenino joven di 24 aña di edad y Co Fundadora di Vadavas, Jewelry, Accessories & More, cu ta un marca di acesorio local y hopi gusta pa nos localnan y turista. Aparte di traha den Vadavas, Valeria ta stima e mundo di Entrepreneurship y ta explorando awor den mercado exterior. E ta un joven empresario cu a pasa den diferente experiencia y semper ta habri pa comparti esaki cu otro. Su presentacion sigur a inspira hopi di nos participantenan y por a scucha esaki tambe na final di e webinar mediante e feedback ricibi.

IDEA lo sigui organisa mas webinar cu enfoke riba Women Entrepreneurship (WE). E webinar aki a tuma luga via plataforma digital y a haya un participacion di en total 31 hende muhe. IDEA ta sumamente contento cu e contenido di e webinar y di un tremendo presentacion di srta. Valeria Gomez.

IDEA lo sigui cu su webinarnan den 2022 cu lo dedica na un y tur cu kier cuminsa un negoshi of tin un negoshi existente y kier educa nan mes riba diferente topiconan comercial. Tambe IDEA lo continua cu curso ‘Empresario Prepara II’ den luna di april 2022 y si bo persona ta desea di reserva cupo pa e curso, por tuma contacto cu IDEA via email L.croes@deaci.aw pa registracion y tambe pa mas informacion tocante participacion y pago.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options