Webinar CMMA tocante e fenomeno di traficacion y contrabando di hende

E participantenan tawata consisti di entre otro; diferente Cuerpo Policial, Ministerio Publico y corte. E Webinar ta un seminario virtual, cu ta trata e tema di “Mensenhandel en Mensensmokkel”, pues traficacion y contrabando di hende, di cual CMMA ta e unidad cu ta trata e fenomeno aki. Den cuadro di esaki, algun luna pasa a tene un campaña di conscientisacion, organisa door di CMMA, cu a carga e nomber “habri bo wowo”.

Tin diferente aspecto cu ta trata na atende e fenomeno aki. A inverti hopi den siguridad na nos fronteranan a traves di e “grensoverleg” cu tin vigente, unda tur e departamentonan ta traha hunto pa mehora siguridad na nos frontera. A haci inversionnan manera “Interpol aan de grens” y ta bay inverti tambe den e parti di workshops y seminarionan pa crea mas conscientisacion. Mas di 130 hende a inscribi pa atende e webinar, cual ta consisti di participantenan di tur parti di Reino, entre otro Hulanda, St. Maarten y Boneiro.

Segun coordinadora di CMMA, Sra. Jeanette Richardson, e webinar aki a cuminsa durante temporada di Covid, pa motibo di no por a plan nada fisico cu hende. Pa medio di e webinar aki, lo sigui comparti informacion cu tur hende cu ta traha den e ramo di “law enforcement” y tambe e huesnan y e officier van justitie.

Actualmente, e trayecto ta uno largo di e momento cu ta haya e prome notificacion di un posibel caso di traficacion y contrabando, te ora e caso yega dilanti di un hues. E fenomeno di traficacion di hende ta algo hopi complica, pues esaki kiermen cu prome cu yega cerca nan, mester percura pa ta bon informa. Pa e motibo aki, a bin cu 2 experto di Hulanda cu tin mas cu 20 aña di experencia den e ramo di traficacion y contrabando di hende, hunto cu Ministerio Publico, cu por yuda y brinda nan experticio den e parti di con ta arma un caso.

E enfoke di e webinar tawata e parti di “opsporing”, pues e parti di investigacionnan, por ehempel kico tur mester tene cuenta cune, pa ora di presenta e caso dilanti hues, pa asina percura pa esaki ta un caso solido. Lo tin diferente orador cu a base di nan conocemento y experticio, lo splica con ta atende cu esaki.

Minister Tjong a expresa cu e ta sumamento contento cu e tremendo iniciativa aki di CMMA. E tipo di seminarionan aki ta hopi importante, pa asina por comparti tur informacion cu e diferente departamentonan y partnernan den Reino.