E edificio a wordo construi na 1934 y su funcion tabata pa percura pa red di distribucion di awa pa San Nicolas y bisindario. Cu e construccion di tankinan di awa cu un capacidad mucho mas grandi pa cumpli cu e demanda pa awa, e watertoren no tabata tin un funcion mas. Den añanan nobenta a sac’e for di servicio y e doño WEB Aruba N.V. a pasa e edificio pa Fondo di Monumento.
E edificio monumental aki, igual cu esun na Oranjestad, ta representa e inicio di distribucion di awa pa tur cas na Aruba y ta parti di e herencia cultural di Aruba. Den e edificio di watertoren na Oranjestad ta situa e oficina di LAR y esun na San Nicolas lo bira un museo industrial. Aki e companianan WEB, ELMAR, SETAR, Aruba Airport Authority y Utilities lo expone e historia industrial di Aruba y asina traspasa e informacion na hoben, adulto y turistanan.
Restauracion di e watertoren a tuma luga durante diesun luna y a costa 2.2 miyon florin.
Share this page