VUT ta un instrumento cu gobierno ta introduci pa baha gasto di personal

ORANJESTAD - Riba 16 di juni 2022, durante conferencia di prensa di Gobierno di Aruba, Prome Minister Evelyn Wever-Croes y Director di Departamento di Recurso Humano señora Omaira Lares a elabora ampliamente riba e areglo di VUT.

Oportunidad pa aplica pa VUT a habri riba diaranson 15 di juni y e ultimo dia pa aplica lo ta dia 14 di augustus. Ambtenaarnan tin dos luna di tempo pa aplica. E ultimo fecha cu e ambtenaar por tuma VUT ta dia 1 di september di 2023.

VUT ta un di e instrumentonan cu Gobierno ta introduci den esfuersonan pa baha gasto di personal. Den e graficonan inclui, por tuma nota cu Gabinete Wever-Croes a baha gastonan di personal.

Conferencia di prensa di Gobierno di Aruba, riba 16 di juni 2022 durante cua Prome Minister Evelyn Wever-Croes y Director di Departamento di Recurso Humano señora Omaira Lares a elabora ampliamente riba e areglo di VUT.Grafico 1: (Inclui den e Relato Anual 2021 di Ministerio di Asuntonan General)

Grafico 1 ta mustra e cantidad di persona den servicio di Gobierno. Desde 2017 caba Gobierno ta trahando riba reduccion di gastonan di personal. Na final di 2017 cu Gabinete Wever-Croes a cuminsa goberna, tabata tin 4869 hende ta traha den Gobierno y na fin di 2021 el a baha na 4518. Den termino absoluto e la baha cu 351 persona cu ta 7.2% den cantidad di persona.

Grafico 2: (Inclui den e Relato Anual 2021 di Ministerio di Asuntonan General)

Den grafico number 2 por nota kico e cantidad aki ta nifica den placa. E gastonan di personal tambe a baha durante e añanan di gobernacion Wever-Croes. Na 2018 e tabata na 476.4 miyon. Na 2019 el a baha cu -0,3%, na 2020 el a baha cu 10% y na 2021 el a baha cu -2,3%.

Grafico 3:

Grafico number 3 ta indica e proyeccion pa bay padilanti. Na aña 2020 y 2021 debi na e recorte di 12.6%, e gastonan a baha considerablemente. Den 2022 e ta subi poco ya cu tin proyecta pa duna 5% bek di e 12.6%. Y na 2023 e ta subi pasobra mester duna e 12.6% completo bek. Prome Minister a señala cu asina mes Gobierno ta bou di e palabracion di 479 miyon florin cu Gobierno tin cu Hulanda den e protocol cu Gobierno a firma.

Norma nobo:

Prome Minister a indica cu den cuadro di e Raft, Gobierno ta negociando un otro norma di personal cu e norma anterior di 479 miyon florin señala den grafico 3. E norma nobo cu Gobierno ta negociando ta di 10% di GDP y esey Gobierno tin 5 aña pa yega y no ta mucho leu di esaki tampoco.

Tuma contacto cu DRH:

Prome Minister ta encurasha tur esnan cu kier tuma VUT pero ainda tin duda si bo kier tuma VUT of si bo no ta sigur si e ta combini bo, pa tuma contacto cu Departamento di Recurso Humano na telefoon 522 9999 of via E-mail: vut@drh.gov.aw pa un cita.

Grafico 1 inclui den e Relato Anual 2021 di Ministerio di Asuntonan General) ta mustra e cantidad di persona den servicio di Gobierno.  Den Grafico 2 inclui den e Relato Anual 2021 di Ministerio di Asuntonan General) por nota kico e cantidad aki ta nifica den placa.  Grafico number 3 ta indica e proyeccion bay padilanti.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options