Vacuna di Influenza den bario

E vacuna di Influenza of tambe conoci como griepprik ta disponibel pa e grupo den comunidad cu ta na risico di bira hopi malo debi na Influenza. E grupo aki ta consisti di e adulto mayor di 60 aña of mas y tambe di persona menor di 60 aña pero cu ta sufri di un of mas malesa cronico.

E adulto mayor di 60 aña of mas ta bin na remarke pa ricibi e vacuna di Influenza completamente gratis y NO mester di un recept di dokter di cas. E adulto mayor di 60 aña of mas cu ta desea di ricibi su vacuna di Influenza por ‘WALK IN’ na seccion di Malesanan Infeccioso di DVG na Oranjestad of por acudi na e Unidad Mobiel den bario. Na momento di presenta mester bin cu e carchi di AZV.

Personanan cu ta sufri di malesa cronico of nan salud ta debil pero NO tin 60 aña ainda tambe por ricibi nan vacuna di Influenza completamente gratis, pero pa esaki si mester ricibi un recept di dokter di cas. Cu e recept e persona por ‘WALK IN’ na seccion di Malesanan Infeccioso di DVG na Oranjestad of por acudi na e Unidad Mobil den bario. Na momento di presenta mester bin cu e recept di dokter di cas y tambe e carchi di AZV.

Tur otro persona cu NO tin 60 aña y tampoco tin malesa cronico pero ta desea di ricibi e vacuna di Influenza por paga pa esaki na un costo di Afl 20,- pero mester traha un cita pa esaki. Na e Unidad Mobil no por cumpra vacuna. Cumpra e vacuna di Influenza ta posibel entre dialuna pa diabierna for di 8:00 pa 11:45 di mainta of 1:00 pa 3:30 atardi na seccion di Malesanan Infeccioso di DVG na Oranjestad.

Pa mas informacion:

• Like nos Facebook page Directie Volksgezondheid DVG Aruba
• Follow nos riba Instagram directie_volksgezondheid_aruba
• Subi nos website www.dvg.aw
• Yama nos na 2800101/5224200
• Mail nos na servicio@dvg.aw