Update COVID-19 29 december, 2021

ORANJESTAD – Riba 29 di december 2021, Crisis team a duna informacion tocante e situacion y casonan di Covid aki na Aruba.

E situacion actual ta uno explosivo den e sentido di cantidad di casonan postivo, cantidad di casonan activo y positivity rate.

Desde cu e crisis a cuminsa Aruba no a experiencia un subida asina drastico di casonan di COVID-19. Naturalmente e rapides cu tur hende ta keda contagia tambe ta hunga un rol grandi. Pa promer biaha Aruba ta bay surpasa mas cu 2,000 caso activo. Ayera mas cu 1,500 persona a bay test cual a resulta atrobe den un cantidad substancial di 667 casonan positivo. E positivity rate ta rond 57%, esey kiermen cu cada 1,000 persona cu test, mas cu mitad ta resultado positivo.

Update COVID-19 – 29 december 2021Toch tin bon noticia, paso te cu awe hospital tin tiki pashent interna cu Covid. No tin niun pashent den ICU na Aruba, pero si 3 den ICU na Colombia. Cama di hospital awor no ta problema, pero si e hecho cu tin varios empleado na hospital cu ta positivo cu COVID.

Tin varios investigacion haci rond mundo riba e variante nobo Omicron, unda e estudionan preliminar ta mustra cu te awor e ta hopi mas contagioso pero menos peligroso. Ta spera cu esey lo ta e caso aki na Aruba tambe. Naturalmente e problema ta e cantidad haltisimo di casonan positivo, cu por tin como consecuencia cu hospital lo bay atende pashentnan cu COVID variante Omicron toch. 

Ta keda pidi Aruba pa bay vacuna, paso e realidad ta cu ainda Aruba no a yega cerca di herd immunity. 62% di nos comunidad a vacuna y pa por a yega e herd immunity mester a yega rond di 85%-90%. Te cu awe 12,525 persona a haya booster shot. Den e estadisticanan cu Aruba tin, esnan mas afecta pa e virus ta esnan cu NO ta saludabel, tin sobrepeso, ta sufri di presion halto, ta diabetico of ta dialisa.

Aruba ta den pleno high season, cu tawata mustra asina prometedor y bon pa nos turismo y economia. Awor e high season ta coriendo riesgo. Cu e cantidad haltisimo di contagio cu tin actualmente, ta cuestion di ora y/of dia cu Center for Disease Control di Merca (CDC) lo pone Aruba bek como high risk. Aruba mes no lo mester haci nada, paso Merca lo tuma medida unda lo conseha biaheronan pa tin cautela ora di biaha pa Aruba. Ya Aruba ta ricibiendo algun 100 cancelacion y load factors di avionnan ta bahando di 75% pa 60%, cual ta hopi liher. Tambe mester a nenga 2 crucero nan entrada pa Aruba. Si nos no logra frena e cantidad di casonan, nos high season ta den problema serio, paso Merca ta wak e situacion di casonan activo ora di declara un pais di risico halto.

A tuma nota un tendencia e ultimo 3 dianan aki cu tur hende na Aruba kier test. Riba su mes, test no ta malo, pero mester corda cu e maneho ta ora bo ta sinti malo y tin sintoma, e ora bo mester bay test. Lo adapta e maneho di isolacion tambe pa esnan cu test positivo y ta asintomatico. E persona nan aki lo mester keda solamente 5 dia den isolacion.

Cinco ola COVID-19 - 13 maart 2020 – 28 december 2021

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options