University of West Florida ta spera di por haya algun studiante di Aruba pa aña 2020-2021

Dit item is gearchiveerd op 12-06-2020.

ORANJESTAD - Recientemente Minister di Educacion y Sostenibilidad di Aruba a firma un Memorandum of Understanding cu University of West Florida, cu ta situa na Pensacola, Florida. 

Campus University of West Florida (UWF)E acuerdo di colaboracion ta encera cu UWF pa aña escolar 2020-2021 ta ofrece na un total di cinco studiante di Aruba e oportunidad pa por studia na UWF na e prijs special cu un residente di Florida ta paga. Loke nos ta yama “instate-tuition fee”. UWF ta dispuesto pa evalua pa proximo aña subi e cantidad di studiantenan cu lo por bin na remarca pa e prijs special aki, depende di e exito di e acuerdo. E prijs special aki ta di USD 5500,00 pa aña. Alabes UWF ta exigi pa tur studiante den nan prome aña biba den e cambernan riba nan campus y nan mester tin un seguro. E gastonan pa esaki ta mas o menos USD 9500 pa aña. Esaki ta yega na un suma total di USD 15.000 pa aña cu ta menos cu e suma cu un studiante por haya pa bay studia na Merca según e reglanan di Arubalening.

Rekisito pa bin na remarke pa un Latin American and Caribbean Scholarship Eligibility (LAC). UWF no tin ningun studiante di Aruba ainda y nan lo kier haya un par di hoben di Aruba na nan Universidad. Pensacola ta keda na e punta Oeste di Florida. UWF ta conta cu mas o menos 13.000 studiante y nan ta conoci pa tin klasnan chikito y personalisa. Recientemente e Minister Plenipotencario di Aruba na Washington DC combersa cu Rachel Hendrix, Directora di e Departamento Internacional na UWF, ken a indica cu te awor ta un hoben so a aplica y nan ta spera di haya mas studiante di Aruba.

Campus University of West Florida (UWF)Ta importante pa sa, cu UWF no ta e unico scol na Merca cu Aruba tin un acuerdo di colaboracion cu nan pa prijsnan reduci. Aruba tin un acuerdo di colaboracion desde aña pasa cu Wayne State College na Nebraska na unda actualmente tin un hoben Arubiano studiando, University of South Carolina y Coastal Carolina University na South Carolina cu tin varios Arubiano studiando pa e ultimo añanan. Tambe Aruba tin algun acuerdo di colaboracion cu algun Universidad na Canada manera Brescia University, Seneca College, Niagara College, Bishop’s University, Centennial College y Carleton University cu tambe tin varios Arubiano studiando na nan Universidad.

Pa aplica pa e Universidadnan aki mester bay riba nan website y aplica normal. Pa e Universidadnan na Florida alabes mester bay riba nan site di Latin American and Caribbean Scholarship y mester aplica eynan tambe pa haya e tarifa reduci aki

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options