UNESCO Aruba ta preparando pa Aruba ta anfitrion di e conferencia regional di MOWLAC na november 2022

ORANJESTAD - Aruba lo ta  anfitrion di e conferencia regional di Memory of the World program for Latin America and the Caribbean (MOWLAC) na november 2022.

Recientemente Minister di Cultura Xiomara Maduro a reuni cu sra. Marushka Tromp y sr. Peter Scholing di e Comite Nacional di UNESCO na Aruba pa haya sa mas di e preparacion cu ta tumando luga pa asina Aruba por ta anfitrion di e conferencia aki.

Minister di Cultura Xiomara Maduro ta reuni cu sra. Marushka Tromp y sr. Peter Scholing di e Comite Nacional di UNESCO na Aruba tocante preparacion cu ta tumando luga pa asina Aruba por ta anfitrion di e conferencia Memory of the World Program for Latin America and the Caribbean (MOWLAC).Logo Memory of the World Program for Latin America and the Caribbean (MOWLAC).Desde 1992, UNESCO ta promociona y coordina e programa Memory of the World (MOW) cu ta preserva y brinda acceso na documentacion y herencia digital di relevancia grandi pa tur persona na mundo.

E meta di e programa ta pa evita cu, entre otro, guera, intrankilidad social, falta di recurso, sabotage, comercio ilegal y destruccion, por causa cu documentonan historico por disparce di e memoria colectivo di humanidad.Pa e region di Latino America y Caribe un Comite bou e nomber di MOWLAC ta guia e programa aki.

Na Aruba tambe trabounan ta wordo haci na Biblioteca Nacional Aruba y tambe na Archivo Nacional Aruba pa conserva e memoria colectivo di nos Pais. Nos por ta orguyoso di e coleccion digitalisa di Biblioteca Nacional Aruba cu recientemente danki na e contribucion valioso di Archivo Nacional Aruba y Departamento di Legislacion, ta conta tambe cu informacion digitalisa di e Historia Colonial di Aruba. Ta trabounan importante cu a haci pa conserva e historia di nos Pais cu ta hala atencion positivo pa nos Pais den e programa di MOWLAC.

Minister Maduro ta gradici e Comite Nacional di Aruba pa tur e trabounan cu ta  haci pa asina Aruba por ta un anfitrion digno di e conferencia di MOWLAC na november proximo.

Mas informacion riba MOWLAC por haya via http://mowlac.org/en/about-mowlac/. Por tira un bista riba e coleccion digital di Historia Colonial di Aruba via https://archive.org/details/BNA-DIG-PB-1816-1851

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options