UNESCO-Aruba cu mas cooperacion entre e Comisionnan Nacional di UNESCO den Reino Hulandes

Desde 2010 tanto Corsou como Sint Maarten a bira miembro asocia di UNESCO, hunto cu Aruba desde 1987. Despues cu a formalisa e secretariado di UNESCO-Aruba na 2020, UNESCO-Aruba pa prome biaha tin specialistanan pa coordina e programanan internacional di UNESCO. Aruba ta resorta atrobe desde 2019, bou di e oficina sub-regional di UNESCO na Kingston. Esaki ta nifica cu awor tur e 3 miembronan asocia di UNESCO di Reino Hulandes por traha hopi mas estrecho hunto riba tur e areanan di trabou di UNESCO cu ta keda ehecuta den Region Caribe.

Den luna di februari Sra. Anna Paolini, directora di UNESCO-Kingston a bishita Aruba, unda e tabatin un encuentro cu entre otro Minister di Finansa y Cultura, Sra. Xiomara Maduro, kende ta presidente di e comision nacional di Aruba. A discuti varios tema y a palabra pa intensifica e cooperacion entre e oficina na Kingston, e secretariadonan di cada pais den regio y representante fiho di Reino Hulandes na Paris. Den cuadro di e cooperacion den Reino e Secretaris-Generalnan ta reuni structuralmente cada dos luna.

E reunion na februari ultimo a tuma luga na Den Haag, unda cu e specialista di cultura di UNESCO-Aruba sra. Ruby Eckmeyer a representa Sra. Marushka Tromp, actual Secretaris-General pa Aruba.

Relaciona cu e palabracionnan pa intensifica e cooperacion entre e diferente organonan di UNESCO, for di 6 pa 8 maart venidero lo ta di bishita na Aruba dos representante for di UNESCO-Paris. Ta trata aki di Sra. Moninque van Daalen, embahadora extraordinario y plenipotenciario di e Delegado Permanente di Reino na UNESCO Headquarters, hunto cu su suplente Sra. Carlien Schrijvershof. Esaki ta e prome biaha cu Comision Nacional di Aruba ta ricibi bishita di e Delegado Permanente di Reino directamente for di Paris.