E exit strategy aki tawata hopi importante pa Aruba su recuperacion di turismo. A flexibilisa e ‘’inreisbeleid” pa asina por percura asina atrae mas turista.
E variante omicron tawata tin su efecto riba Aruba su turismo y a sinti esaki den luna di januari 2022.
A proyecta cu pa aña 2022 lo tin un recuperacion di entre 85% pa 100% di turismo den comparacion cu aña 2019 cu tawata Aruba su miho aña den historia.
Un highlight den luna di januari 2022 sigur tawata e hecho cu no obstante un caida den turismo di cantidad di bishitante, toch a mira un recuperacion di 79% di e ‘’tourism receipt” cu ta e indicador di mas importante pa midi calidad di turistanan.
Siman pasa gobierno a tuma e decision cu Aruba ta bolbe bek na normalidad y asina elimina tur restriccion cu tawata existi. Cu esaki e focus ta pa Aruba focus riba recuperacion di turismo pa asina recupera e economia y crea oportunidadnan cu pais Aruba tin mester di dje.
Riba diasabra 19 di februari, 2022, a yega un total di 5316 turista via nos aeropuerto di cual 4384 tabata procedente di Estados Unidos cu ta nos mercado di mas importante, sigur un diasabra grandi pa e recuperacion di nos turismo. Diadomingo 20 di februari 2022 a drenta nos porta maritimo e dos barconan crucero Celebrity Cruises, cu ta Celebrity Reflection and Celebrity Constellation.
E ‘’load factors” nan di avionnan ta subiendo y ta yegando rond di 70% caba. E aerolineanan ta manteniendo nan capacidad di asiento cu a reserva pa Aruba. Esaki sigur ta demostra e confiansa cu aerolineanan tin den prodcuto Aruba.
Minister di Turismo y Salud Publico Sr. Dangui Oduber ta satisfecho di mira un weekend caminda hopi turista a yega nos isla, sea ta via nos aeropuero of crucero. Un weekend cu hopi trabou pa nos taxista, tour operators, restaurantnan y tiendanan.
Share this page