E meta ta recuperacion di nos turismo y pa yega y surpasa e nivelnan di nos turismo di aña 2019 cual tawata e miho aña di turismo den Aruba su historia.
Minister di Turismo y Salud Publico Oduber ta hopi satisfecho cu e resultado, danki na e bon cooperacion y comunicacion cu tur partnernan den turismo. Tur indicador ta demostra cu Aruba ta recuperando su turismo y te hasta surpasando nivelnan di aña 2019 cual sigur ta algo sumamente remarcabel.
Den luna di april 2022 Aruba a recupera 108% di nos turismo den comparacion cu april 2019. Den luna di mei 2022 e mesun tendencia di recuperacion a continua y nos a experiencia un recuperacion di 103% den comparacion cu mei 2019. E datonan ta ilustra claramente cu pa e lunanan di april 2022 y mei 2022 nos a yega y surpasa nivelnan di aña 2019. E recuperacion di nos turismo ta fuerte y Aruba a haya reconocimento pa instancianan internacional manera IMF y CAFT pa e recuperacion fuerte aki.
E fin di siman aki, Aruba a ricibi un gran cantidad di turista cu ta un indicacion cu e trend cu tawata tin den luna di april 2022 y mei 2022 ta continua. Aruba a ricibi riba diasabra 25 y diadomingo 26 di juni un total di 9013 turista. Aerolineanan ta manteniendo nan capacidad di asiento cu a reserva pa Aruba tambe y ta demostra e confiansa cu aerolineanan tin den nos producto Aruba. Banda di esaki ya caba a anuncia un gran cantidad di vuelonan nobo, manera Sarpa for di Colombia y tambe Air Canda for di Toronto. Dentro di poco nos lo anuncia noticianan historico pa Aruba den cuadro di diversifacion di nos turismo.
Mester sigui enfatisa cu e logro di Aruba su recuperacion ta di gradici na esfuerzo nan conhunto di Ministerio di Turismo y Salud Publico conhunto cu partnernan manera ATA, AAA, APA & AHATA.
Turismo ta keda e driver principa di nos economia.
Share this page