Un aña pasa a introduci ley di tabaco

E ley aki ta prohibi cualkier persona menor di 21 aña pa cumpra of uza tabaco pero tambe pa traha den area cu ta bende producto di tabaco. DVG ta conscientisa comunidad y comercio riba contenido di e ley aki y lo cuminsa pronto cu control pa cu cumplimento di e ley di tabaco. 

Pa por eherce e control debidamente, a forma 8 ambtenaar di Dienst Warenkeuring en Hygiene di DVG den Bijzonder Opsporingsambtenaar (BOA), cu ta duna nan e autoridad pa supervisa e cumplimento di e Landsverordening Beperking Tabaksproducten y actua por medio di proces-verbaal of boet.

E Landsverordening Beperking Tabaksproducten ta prohibi:

• Benta di sigaria of cualkier producto di tabaco na persona menor di 21 aña;
• Benta di sigaria los. Mester bende sigaria den su envoltura cera y seya;
• Humamento den lugar publico cu excepcion di establecimento cu permiso pa tin un espacio asigna pa humado;
• Menor di edad traha den negoshi cu ta bende producto di tabaco;
• Si ta un market, ta prohibi pa menor di edad (21 aña) traha den e area aparta pa bende producto di tabaco;
• Pa parti producto di tabaco gratis;
• Pa huma den transporte priva ora cu tin menor di edad den auto;
• Pa huma den transporte publico;
• Pa bende of duna producto di tabaco den espacio di cultura y arte, medico, gubernamental, deportivo y di educacion.

Dunado di trabao ta responsabel pa proteha tur empleado for di huma di sigaria/siga durante ora di trabao y riba tereno di trabao.

Aruba por logra tin un comunidad mas saludabel. E ta rekeri responsabilidad y compromiso pa cuida nos mes, come saludabel y ta activo. Sea consciente cu tabaco ta malo pa salud.