Turtuga di lama na Aruba, pa cuanto tempo mas nan lo tey?

Dit item is gearchiveerd op 01-07-2020.

ORANJESTAD- Cumpliendo cu nan tarea y autoridad den maneho di e ley di CITES, Veterinaire dienst seccion di Departamento di Salud Publico hunto cu Turtuga Aruba kier un bez mas recorda comunidad cu ta contra ley pa gara, mata, bende y consumi carni di turtuga.

Banda cu ta considera turtuga un bestia protehi segun nos “Natuurbeschermingsverordening” e turtuga tambe ta proteha pa e convenio International di CITES (https://www.cites.org).

Den luna di mei a haya restonan di turtuga na diferente sitio manera Boca Grandi, Fisherman’s Hut, Rooi Kochi en Sabana Blanco.

Tortuga di lama caret (Eretmochelys imbricate)Mayoria di e restonan encontra ta di Hawksbill seaturtle (Eretmochelys imbricate) y Green turtle (Chelonia mydas) y e restonan mayoria tawata indica un morto no natural y ilegal.

Veterinaire dienst hunto cu Turtuga Aruba ta haci un suplica na comunidad di Aruba pa sigui raporta e casonan unda turtuga ta wordo gara, mata of bendi na polis. Es (nan) cu wordo gara ta haci e practicanan aki, por wordo persigui penalmente.

E sorto di turtuganan aki ta pertenece den nos awanan teritorial y nan ta hunga un rol hopi importante den mantene e bida marino den balans. Banda di esaki e beachnan di Aruba ta unda  e turtuganan aki ta pone nan e webonan cada 2 pa 5 aña na e mes un caminda cu nan mes a nace. Un averahe di 1 riba 1000 turtuga cu nace ta keda bibo y ta logra yega madures pa por completa su ciclo di bida. Esaki ta e motibo pakico tur Turtuga ta wordo proteha pa ley.

Si bo persona kier haya sa mas tocante Turtuga, bo por tuma contacto cu Turtuga Aruba na (turtugaruba@hotmail.com) y si ta desea por inscribi como voluntario. Mas boluntario nos tin mas nos comparti informacion na comunidad y haci e posibilidad cu e turtuganan ta biba mas un realidad. Asina nos por sigui presencia nan nacemento riba beachnan di nos dushi Aruba.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options