Turismo: inversion den infrastructura y hende (gearchiveerd)

Durante e apertura di e Annual Tourism Conference for North America, ministro Otmar Oduber a indica cu mirando e exigencianan di e turista di awendia, Aruba a crea un plan strategico pa cumpli cu e demanda. Por ehempel mas actividad basa ariba experiencia y relacion, exploracion di e isla, mas aventura y facilidad pa mas uzo di tecnologia.
Aruba ta consciente di e factornan cu por influencia e turista manera e aumento di prijs di petroleo, eleccion na Merca y e situacion economico na Europa. Pero pa medio di un promocion creativo y innovativo kier crea strategianan nobo pa atrae e turista.
Aruba actualmente ta inverti den e infrastructura di e isla manera renoba y revitalisa e centro di Oranjestad, introduci un trolly pa hiba e turista crucero pa e centro, construccion di e linear park mas grandi den Caribe, presentacion di arte y musica na Aeropuerto, limpiesa di e isla, mehora calidad di beach etc.
Di otro banda e factor humano tambe ta haya tur atencion. Hunto cu Enseñansa pa Empleo, Aruba Tourism Authority, Departamento di Cultura y diferente otro instancia a introduci e Aruba Certified Programme. E programa aki ta pa yuda e empleado den sector di turismo pa engrandece su conocemento tocante cultura y historia di Aruba y tambe pa mehora su habilidad pa duna servicio.
A pesar di e desaroyonan mundial, Aruba lo sigui vigila e situacion pa haya mas vuelo pa e isla, segun e mandatario encarga cu Turismo.