Aruba su turismo a recupera 72% den comparacion cu aña 2019 haciendo aña 2021 un bon aña di recuperacion. Den e grafica ta ilustra con esaki tabata durante henter e aña. Un di e indicadornan di mas importante ta e tourism receipt. Esaki ta e cantidad di placa cu e turistanan ta laga atras den Aruba su economia. E tourism receipt di aña 2021 a surpasa esun di aña 2019. Kiermen menos turista a gasta mas placa.
Turismo crucero ta esun cu a keda mas afecta door di e pandemia. Ta apenas den luna di juni 2021 Aruba a ricibi su prome crucero. E industria aki a cuminsa hopi slow y poko poko a cuminsa crece gradualmente.
Minister a duna di conoce cu den e luna di december 2021 Aruba a ricibi un total di 48,209 bishitante crucero compara cu 126,452 den december di 2019. Esaki ta encera un caida di 61.9%. E cantidad di calls nan tabata 35 den december 2021 compara cu e 50 den december 2019.
Den aña 2021 Aruba a ricibi un total di 136,211 bishitante crucero compara cu 832,399 bishitante crucero den 2019, cu ta representa un caida di 85%. Den 2021 Aruba a ricibi un total di 96 calls compara cu e 324 cu Aruba a ricibi den 2019, un diferencia di 228 calls menos.
Ultimamente Aruba su turismo a sufri un caida substancial door di e variante di Omicron. Den e prome 3 siman di 2022 Aruba a registra un caida di entre 25% pa 30%. Por a tuma nota cu e aerolineanan manera Frontier Airlines y Air Canada a suspende nan vuelonan pa Aruba. Tambe a mira hopi cancelacion den e gruponan di negoshi.
E proyeccion 2022 tabata mustra cu Aruba lo bay recupera 100% di su turismo den comparacion cu 2019. Lamentablemente door di e variante di Omicron esaki a keda ahusta na 85% di recuperacion. Segun e mandatario Omicron a cambia e perspectiva pero ainda tin tempo pa recupera di e retraso. Por logra esaki tumando e pasonan corecto y calcula e risiconan. Nos tur ta depende di turismo.
Share this page