Tur rechercheur di Jeugd en Zeden Politie aworaki ta certfica pa verhoor

Na december e parti teoretico di e curso a tuma luga, y awor a conclui cu e parti practico, y asina awor henter “Jeugd&Zeden Politie” (JZP) ta certifica. Ademas di e profesionalnan di JZP, a certifica tambe e diferente psicologonan di Orthopedagogisch Centrum , Directie Voogdrijraad y KIA.

Segun Minister di Husticia y Asunto Social, Rocco Tjon, den varios ocasion a trece pa dilanti, cu e parti mas importante pa atende cu e casonan di abuso sexual ta e investigacionnan cu ta haci. Esaki ta algo cu “Orde van Advocaten”, tambe a vocifera.

Nan a splica na parlamento, ora cu ta trata nan defensa den un caso asina, sa desacredita e investigacon cu a haci. Por medio di haci mihor investigacionnan y percura pa esakinan ta hermeticamente cera, ta permiti cu e inversionnan aki ta di balor agrega. Tin varios otro paso cu ta tumando luga, manera Ministerio Publico dentro di poco lo anuncia un “aanwijzing” nobo pa loke ta trata “opsporing”, ora ta trata specificamente e tipo di casonan aki. Minister Tjon a expresa di ta contento di a mira dos fiscal cu a presenta den nomber di Ministerio Publico pa e entrega di e certificadonan aki.

Kinterview ta un organisacion renombra riba e material aki, cu tin hopi aña di experiencia. Ademas nan tin hopi aña ta dunando e cursonan aki na Hulanda, unda nan ta certifica polisnan Hulandes. Banda di esaki, a splica na tur esnan cu a logra ricibi nan certificado y esnan presente, cu ya a logra cumpra tur e materialnan necesario pa por ekipa e “studioverhoorruimte” cu camaranan nobo. Asina por cumpli cu tur e regla y normanan internacional, pa ora di presenta e investigacionnan aki dilanti un hues, por ta sigur cu e caso ta solido. Aworaki na Aruba por bisa cu tin suficiente profesionalnan pa por conduci e investigacionnan aki na alto nivel.  

Minister Tjon lo kier termina cu gradici señora Daphny Tecklenborg, cu ta encarga cu e proyecto di “Family Justice Center” pa a organisa y maneha e curso aki. E obhetivo ta pa e curso aki continua, pa asina nos profesionalnan keda haya e training necesario aki.