Tur comerciante chikito cu tin e status di KOR 2022 mester entrega nan declaracion anual di aña 2022 - E fecha final ta 16 di januari 2023

Departamento di Impuesto ta recorda tur comerciante cu ta beneficia di e areglo pa comerciante chikito (kleineondernemersregeling of KOR) pa aña 2022, cu nan tin e deber di entrega e declaracion anual di BBO/BAVP y BAZV 2022.

E entregamento di e declaracion ta sosode den forma digital via e portal ‘BO impuesto’. E fecha final pa haci e declaracion ta 16 di januari 2023. Si entrega e declaracion laat of keda sin entrega e declaracion, e comerciante lo perde su status di KOR automaticamente. 

Mester haci declaracion 

Apesar cu no tin mester di entrega e declaracion tur luna, te cu aña 2022 ley ta stipula cu e comerciante chikito cu tin e status di KOR mester entrega e declaracion anual (jaaraangifte) di BBO/BAVP/BAZV di aña 2022. Di e forma aki inspector por evalua si e comerciante por sigui mantene su status di KOR. Pues inspector, lo evalua si e volumen di benta (omzet) di aña 2022 a surpasa Afl. 84.000. Te cu aña 2022 e limite di entrada di benta pa aña ta Afl. 84.000. Entrante aña 2023 e suma aki ta bira Afl. 50.000 conforme e regulacion nobo stipula den e cambio cu a tuma lugar recientemente den e ley di “Plan di Impuesto 2023”.  

 Con ta haci declaracion?

Kleineondernemersregeling KORE comerciante chikito ta declara e volumen di benta 2022 via e declaracion digital di BBO/BAVP y BAZV. Esaki ta sosode via e portal ‘BO impuesto’. 
Pa e usuarionan di BOi cu tin un periodo cu no ta uzando e portal, ta recomendabel pa log in mas lihe posibel pa controla si e password ta valido ainda. Si e password a caduca mester drecha esaki mas lihe posibel pa no haya contratempo ora cu mester entrega e declaracion di BBO/BAVP y BAZV. Si tin pregunta por yama 5227437 of manda un e-mail na boi@impuesto.aw

Con mester yena e declaracion?

Aki ta sigui un ehempel con e comerciante chikito ta yena su declaracion den un situacion normal.
Volumen di benta (bedrijfsomzet) 2022     Afl. 58.000 

Ta yena e declaracion asina:
Vrijgestelde omzet:                       0,00 (nihil)
Belaste omzet BBO en BAVP:     58.000
Belaste omzet BAZV:                   58.000

E sistema automatisa mes lo calcula e suma di impuesto. Den caso di KOR, e sistema lo mustra cu e suma di belasting ta cero (nihil) mirando cu e volumen di benda den e ehempal aki ta cay bou di e limite di entrada di benta pa aña di Afl. 84.000. Tuma nota cu no por yena e suma di benta na ‘vrijgestelde omzet’. E parti aki no ta destina pa esnan cu tin e status di KOR. E seccion aki ta pa e comerciantenan cu pa ley tin un actividad cu ta cay bou dispensacion di impuesto. 

Fecha final pa haci declaracion

Manera menciona, tur comerciante cu tin e status di KOR 2022 mester haci e declaracion anual di 2022. E fecha final ta 16 di januari 2023. Si haci declaracion despues di dia 16 di januari of keda sin haci declaracion, esaki lo nifica cu automaticamente e comerciante chikito lo perde e status di KOR. Consecuencia di esaki ta cu e comerciante chikito lo tin cu cuminsa haci declaracion y paga BBO/BAVP/BAZV tur luna manera tur otro comerciante. 

Departamento di Impuesto ta haci un apelacion fuerte na tur comerciante chikito cu actualmente por haci uzo di e beneficionan di KOR, pa cumpli cu e declaracion di BBO/BAVP y BAZV di 2022 na tempo y asina evita tambe gasto extra innecesariamente. 

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options