Ministerio di Transporte, Integridad, Naturalesa y Asuntonan di Adulto Mayor a anuncia e proyecto aki riba 22 di februari 2022 .
Dilanti un grupo di panelista diverso, un total di 24 pitch a ser presenta. E participantenan no solamente a elabora riba kico nan idea ta, pero tambe e cooperacion cu lo tin mester for di gobierno pa logra recicla, re-uza y reduci diferente "waste streams", of tipo di desperdicio.
Inicialmente a ricibi 34 pitch, di cual a selecta 31 pa presenta na e Pitch & Switch event, y for di cual 24 compania/persona a presenta nan idea na un panel di experto diverso. Cu esaki gobierno ta tuma e siguiente paso, pa hunto cu e gremionan comercial y stakeholders, yega na un solucion duradero pa e problema di desperdicio na Aruba.
Pa reenforsa legislacion, mester crea e fundeshi solido den comunidad unda tin infrastructura y legislacion na vigor pa redirigi diferente tipo di desperdicio. Asina e diferente organisacionnan involvi por procesa e deperdicio aki.
Importante ta pa menciona cu Trash 2 Cash no ta compromete gobierno na ningun compromiso financiero. E rol di gobierno den esaki ta di facilitador y esun responsabel pa medio di ley, establece e normanan, condicionnan y criterianan. Di e forma aki Minister Ursell Arends kier traha conhuntamente pa soluciona e problema di desperdicio, y finalmente pone un fin na e dump di Parkietenbos.
Gobierno tin como meta pa catalisa actividadnan di reciclahe y economia circular mas pronto posibel, y mester henter comunidad su colaboracion pa tuma e pasonan necesario.
E panelista y organisadornan di e evenemento aki lo pasa riba tur e datonan colecta pa asina haci un analisis. Despues lo entrega e analisis na Minister Arends pa asina tuma e pasonan necesario pa fortifica e propuestanan haci.
Keda altanto di esaki door di bishita e website www.trashtocasharuba.org of like e pagina di Facebook di Trash to Cash Aruba.
Share this page