Trabounan a inicia pa cu renobacion di huis van bewaring

E renobacion ta un inversion substancial pa amplia e capacidad di e edificio, caminda ta ubica personanan indocumenta. Lo renoba e oficina principal di GNC, pero tambe lo bay crea un espacio caminda e personal por haci nan trabou bou circunstancianan mas apto.  

E proyecto aki ta acopla na un proyecto di ICT caminda ta bay percura pa e personal cu ta traha na GNC por tin un sistema automatisa pa por traha cune. E proyecto aki ta cay bou di ActPol, cu ta e “module” pa loke ta trata e cadena di estranheria. ActPol, manera ta conoci, ta e sistema automatisa cu Cuerpo Policial tambe ta uza. Pues di e forma aki lo bay percura pa e dos departamentonan aki ta mas sincronisa na otro, pa di e forma ey comparti informacion miho cu otro.

E proyecto aki ta toca e parti di infrastructura y inversionnan cu ta haci riba e parti tecnologico, pero di otro banda, manera ta conoci, luna pasa a firma un MOU entre GNC y Rode Kruis. Bou di e MOU aki, a brinda Rode Kruis acceso na e facilidadnan di GNC pa na momento cu tin un keho, Rode Kruis mes por drenta y wak e circunstancianan bou cual e personanan ta ubica. Segun e Mandatario a expresa, Gobierno di Aruba a asumi su responsabilidad y ta haciendo e inversionnan necesario.

Sinembargo, na final di dia e ta keda e responsabilidad di cada persona cu ta wordo ubica na “Huis van Bewaring”, pa percura tambe cu e condicionnan bou cual nan ta ubica wordo bon manteni.

Por ultimo, Minister Tjon a informa riba e diferente inversionnan cu ta bay tuma luga. Algun proyecto cu ta presupuesta pa aña 2022, y como tal a wordo inverti aden caba ta: Maritiem Politie, Departamento di Asunto Social cual ta bay continua cu e renobacion completo, construccion di e edificio nobo di FMAA/SPD y Guarda Nos Costa. Adicionalmente, dentro di dos siman, lo bay anuncia tambe, renobacion completo di e brandweer post na San Nicolas, cual ta proyecta di ta un inversion bastante grandi.

Minister Tjon a manda palabranan di pabien y gradicimento na DOW como tambe e compania ALBO cual ta bay percura pa e proyecto di renobacion aki di “Huis van Bewaring” por ta uno exitoso.