Minister Maduro a gradici Qredits pa nan yudansa pa brinda micro credito na interes reduci na mas di 100 compania chikito y mediano na Aruba pa asina nan por a enfrenta y surpasa e efectonan di e pandemia. Sr Groeneveldt a informa cu Qredits a bolbe pone un suma disponibel pa asina por sigui brinda fiansa na interes reduci pa sigui yuda e companianan chikito y mediano. Banda di esaki e ehecutivonan di Qredits a splica riba e bunita proyecto 'BeYourOwnBoss' na unda hobennan di EPI lo wordo prepara pa bira futuro 'entrepreneurs' di nos Pais.
E programa a cuminsa riba 1 di februari, 2021 y tin duracion di 18 siman. Un total di 100 studiante di e sector Hospitalidad y Turismo na EPI ta e promer grupo cu ta participa y lo keda certifica. Lo incorpora e programa di educacion acredita aki den e curiculo existente na e sector. Ya caba a incorpora e programa aki den e curiculo di mas di 100 scol na nivel MBO na Hulanda. E compromiso di Colegio EPI ta pa den e añanan cu ta bin pa sigui incorpora e certificacion aki den e curiculo di programanan existente y nobo pa tur studiante.
Tambe lo ofrece e programa 'BeYourOwnBoss' na publico general y lo cuminsa e di dos siman di februari 2021 cu un sesion di introduccion. Les mes lo cuminsa oficialmente e siman di februari 15 y lo caba na final di juni. Lo presenta e programa di educacion na e idioma Ingles y lo organisa e lesnan dos biaha pa siman di 6:30 – 9:00 p.m. na Colegio EPI den un forma di educacion combina tanto físicamente como virtual. E costo di henter e programa ta Afls. 350,-
Inscripcion pa publico ya caba ta habri pero limita. Pa inscribi y mas informacion por bishita e pagina di Facebook di Colegio EPI of di Qredits Microfinanciering Nederland (Aruba) uza e siguiente link: https://bit.ly/2KJr5ck.
Share this page