Team di Censo a sigui curso di Aruba Certification Program (ACP)

ORANJESTAD - Riba 3, 10 y 17 november 2021 team di Registro Civil/ Censo, den sesionnan respectivo di mas o menos 3 ora, a sigui e curso di Aruba Certification Program (ACP)  brinda gratuitamente door di Aruba Excellence Foundation.  

E programa di certificacion aki ta consisti entre otro di conoce nos isla su historia, cultura, flora, fauna, desaroyo (economico y turistico) y e importancia cu esaki tin pa nos tur. Un di e partinan importante di e curso tabata pa refleha riba kico a hiba nos como Arubiano na e exito den desaroyo y servicio excelente.

Team Registro Civil/ Censo.Nos norma y balornan y e zjeito den cual nos ta eherce esakinan, brindando servicio na nos bishitantenan, ta algo cardinal pa cu e exito aki y ta bunita pa refleha riba nan y bira consciente con importante e ta pa conserva e zjeito aki. No solamente pa nos brinda e servicio excelente na nos bishitantenan, si no na nos mesun hendenan tambe y con orguyoso esaki por haci nos. Nos amor pa nos isla, e manera unico cu nos tin di celebra, e union cu mester tin pa nos logra metanan, e libertad di por ta nos mes y ta autentico, nos creatividad cu ta sobresali, e carisma cu ta unico den nos hendenan, e importancia di conserva nos naturalesa, y nos cultura, pa cu orguyo nos yama nos mes un bon Rubiano, ta nos zjeito pa por brinda un servicio excelente.   

Na final, cada participante a haya un pin di Aruba Certified, mi compromiso, y lo ricibi un certificado di A.C.P cu tin un validez di 4 aña.                                    

Censo kier a duna un danki grandi na Susana Romero cu a dirigi e sesionnan y sra. Esther Broeksema cu a haci esaki posibel. 

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options