Ta renobando y mehorando nos beachnan pa nos localnan y nos bishitantenan goso di nan

Durante di un aña y mei bayendo pa dos, Gobierno a lanta un comision yama: “Aruba Amenities”. Den e comision tin representantenan di DOW, DIP, DNM, ATA, Ministerio di Finansas y Cultura,  Departamento di Asunto Economico, Museo Arkeologico Nacional Aruba y ECA.
Miembronan di e comision ta dedica atencion na nos patrimonionan natural y historico pa asina crea programanan di renobacion di e area y facilidadnan y tambe purba crea oportunidadnan nobo pa nos comunidad.

Eagle Beach, ta un playa cu a haya reconocemento internacional como un di e playanan mas bunita di Caribe y di mundo.
A aloca den presupuesto fondonan necesario pa inverti den e trabounan pa saca santo blanco for di sitionan den lama unda ta permiti pa DOW y DIP y DNM.

Trabou realisa
Na Eagle a wordo haci un trabou special pa renoba e santo blanco bou di matanan di druif. E santo aki a satura y cambia di color despues di decadas cu tabata tin campamento, y cu lamentablemente mester bisa cu nos mes a destrui e bunita beach aki. DOW a percura pa haci e area limpi pa awor a basha Santo Blanco nobo E cambionan aki ya caba a trece esfera masha bunita y agradabel, especialmente pa tur esnan cu ta desea di bin pasa dia disfrutando di lama y toch sinta den un poco sombra di e matanan di druif of tambe pa esnan cu ta desea di cana den santo blanco haci ehercicio y distrai pa un rato, Premier Wever - Croes a splica.

Ta hopi importante pa pareu cu ta renoba e patrimonionan pa tambe pone atencion na con por yuda cuida nan. Aruba su playanan ta un habitad natural hopi sensitivo caminda hopi especie ta biba; di e mas grandi cual ta e turtuganan cu ta bolbe tur aña bin pone webo y percura pa nan siguiente generacion, te na esunnan di mas chikito manera; cangreu, soldachi y piscanan. Tambe nos mata y yerbanan di lama y e parhanan cu ta frecuenta e areanan precioso aki di nos naturalesa.  

Cu e trabounan aki na Eagle Beach a completa e prome fase di e renobacion di nos playanan.  Durante e aña aki trabounan lo sigui na otro Playanan y Patriminionan Natural y Historico; entre otro na Ayo, Casibari y pronto Seroe Colorado y San Nicolas.