Ta extende gedoogbeleid di spearfishing entrante 1 di augustus

ORANJESTAD –  Minister di Naturalesa, Ursell Arends a informa cu gobierno su gedoogbeleid pa loke ta trata tiramento di pisca cu harpoen (spearfishing) ta keda extendi.

E intencion tabata pa introduci un maneho nobo entrante 1 di augustus 2022, pero pa brinda suficiente espacio pa inclui tur stakeholders den e proceso, gobierno a dicidi pa extende e periodo di e gedoogbeleid actual, mientras ta concretisando e maneho nobo.

Reunion cu tirado di pisca cu harpoenDia 15 di juli ultimo, minister di naturalesa, Sr. Ursell Arends, a reuni cu un grupo grandi di tiradornan di pisca cu harpoen (“spearfishers”).  Aki a splica na e grupo e intencion di  e minister pa regula spearfishing por medio di legislacion, en bes di prohibi’e por completo.

Conforme palabracionnan haci, minister Arends tabata tin e oportunidad pa dialoga cu stakeholders (profesional-, autoridad-, piscado- y ambientalistanan) riba e tema di regulacion. For di e grupo di piscador, a apunta un total di seis (6) persona cu ta forma parti di e sesionnan pa finalisa e maneho definitivo. E personanan apunta ta practica e actividad, y asina por brinda conocemento y experiencia for di e banda di piscador, pa crea un maneho cu por ser carga pa e partidonan envolvi. E personanan aki ta: Frederick Quandus, Marvin Thiel, Edward Dirksz, Bogdanovic Carolina, Jonathan Koole y Aby Kock.

Basa riba combersacionnan amplio cu stakeholders y tumando den consideracion rapportnan, tratadonan y consehonan ta yega na e conclusion cu base amplio cu speervissen ("spearfishing") ta un di e formanan mas sostenibel di pesca, semper y cuando esaki ta bon regula y controla.

“Maneho ta wordo traha den pueblo y cu pueblo”, minister Arends ta declara. Cu e maneho nobo por laga spearfishing tuma luga na un forma controla y na un forma cu por promove sostenibilidad via cooperacion den e.o. colecta e datonan concerni.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options