Supervision y ehecucion riba un maneho den centro di cuido di mucha ta necesario

ORANJESTAD - Den cuadro di e anochi informativo cu a tuma luga pa cu Ley Kinderopvang, sra. Sue-Ann Ras a indica cu un di e retonan di mas grandi den henter e trayecto di implementacion di Ley Kinderopvang, ta e aspecto di supervision y ehecucion (toezicht en handhaving).

Un manual di regulacion sin supervision y ehecucion lo no ta efectivo, mirando cu mester tin un control coordina y centralisa, pa asina por garantisa un miho aun calidad di e centronan. Durante e anochi aki a elabora tambe, riba con e supervision y ehecucion den e Centronan di Cuido di Mucha lo ta y si tur cos sigui manera ta plania, ta cuminsa e aña aki caba.

Presentacion prome manual di regulacion pa e centronan di cuido di mucha.Presentacion prome manual di regulacion pa e centronan di cuido di mucha.Supervision lo sali di un punto central, pues lo wordo centralisa y coordina pa Departamento di Mucha y Hoben (DMH). E forma di traha lo ta uno integral, pues ta traha hunto cu tur stakeholder, manera DVG, D.T.I., Brandweer, DOW y DIP, pa asina cada departamento por eherce e control cu ta concerni e departamento, a base di e Handleiding Kwaliteitseisen Kinderopvang. No ta e intencion pa cera ningun centro di cuido di mucha, pero mas bien pa duna nan un periodo di transicion y guia pa mehora e aspectonan di atencion y mantene esaki.

Un otro punto cu a trata e anochi aki tawata e Implementacion di Codigo di Proteccion den Centro di Cuido di Mucha. Tin un total di 76 cabesante di Centro di Cuido di Mucha cu ya caba a ricibi e curso aki y aworaki DMH lo percura pa traha un plan di implementacion pa asina tur centro, por sa ken ta nan respectivo Supervisor di Codigo, pero tambe na ki momento por acerca e persona aki y cua ta e pasonan necesario cu nan tin cu tuma, na momento cu tin (sospecho di) abuso di mucha.

Presentacion prome manual di regulacion pa e centronan di cuido di mucha.Presentacion prome manual di regulacion pa e centronan di cuido di mucha.AHATA tawata un invitado special e anochi aki mirando cu DMH y AHATA tin plannan grandi, pa loke ta trata e Centronan di Cuido di Mucha. Sra. Carolina Raven-Merryweather a elabora riba e intencion pa e companianan, caminda por sea adopta e centronan pa asina e yiunan di nan trahadonan por tin un ‘opvangplek’ durante nan oranan di trabou. Di otro banda, lo por wak ki posibilidad tin, pa por cumpra ‘kindplaats’ pa nan trahadonan na e centronan di cuido cu ta cumpli cu e exigencianan minimo di e manual di regulacion. E iniciativa aki a bini, despues di un combersacion cu e organisacionnan, unda cu hopi biaha nan ta haya nan mes cu e reto pa haya e trahadonan den e oranan di anochi, mirando cu nan no tin hende pa cuida nan yiu. E comision aki a acerca e centronan di cuido durante e anochi aki, pa wak ken tur por ta interesa den e proyecto aki.

Na final di e anochi tabata tin oportunidad pa e centronan por vocifera nan mes, como tambe haci pregunta. Ta bon pa remarca cu e sentimento ta unanime y e Centronan a indica cu nan kier pa e Ley di Kinderopvang aki drenta na vigor, pero den fase di transicion, pa asina tur Centro por traha riba mesun nivel.

DMH ta contento cu e presencia di e 54 Centro di Cuido di Mucha pa e anochi aki y a indica tambe cu e centronan aki cu ta existente, lo tin di entrega algun documento, pa asina por yega na e prome permiso pa opera. Pues tin hopi  movecion positivo pa loke ta trata e Centronan di Cuido di Mucha y tur esaki a sosode den apenas dos aña bou di mandato di Ministerio di Husticia y Asuntonan Social y henter Gabinete Wever Croes I y II, cu ta sostene e implementacion di e ley aki completamente.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options