Subsidio di salario y derecho di trahado durante COVID-19

Dit item is gearchiveerd op 26-06-2020.

ORANJEStAD- Departamento di Labor y Investigacion ta contesta e preguntanan mas frecuente relaciona cu subsidio di salario y derecho di trahado durante e pandemia COVID-19.

Kico ta subsidio di salario? 

Subsidio di salario ta un ayudo financiero di Gobierno na companianan cu durante e crisis actual di COVID-19 a perde por lo menos 25% di nan entrada pa luna.

E meta principal di e subsidio di salario ta pa mantene mas tanto trahado den servicio aunke tin 0 of menos entrada di benta y pa garantisa pago parcial di salario na e trahado. SVb ta encarga cu pago di subsidio di salario. E companianan cu kier bin na remarca pa subsidio di salario mester aplica tur luna pa esaki y mester cumpli cu cierto rekisitonan. 

Kico ta e pago di salario na e trahado segun e subsidio di salario? 

Gobierno lo duna dunado di trabou, depende di su perdida di entrada, subsidio pa paga e trahado te cu un maximo di 60% di salario registra na SVb te cu e limite di salario maximo di SVb cu ta Afl. 5.850,- pa luna.

Dunado di trabou mester paga 20% di salario y trahado lo entrega 20% di salario trahando menos ora ('arbeidstijdverkorting'). Den caso cu dunado di trabou no por paga su parti di 20% di salario e mester yega na un acuerdo cu su trahado riba e 40% di salario trahando menos ora (‘arbeidstijdverkorting’). Pues punto di bista ta cu trahado ta traha e candidad di ora segun e salario cu e ta ricibi, a menos cu partidonan a cumbini algo otro.

Dunado di trabou por keda paga e trahado solamente 60% di salario? 

E dunado di trabou cu a aplica pa subsidio di salario mester paga un salario bruto di por lo menos 60% di e salario registra na SVb. Mirando cu tur luna mester aplica pa subsidio di salario y esaki ta depende di e perdida di entrada benta, lo mester evalua e situacion financiero di e compania cada luna. Asina cu tin mas actividad economico, mas oranan di trabou y pues mas entrada, e compania lo mester ahusta e oranan di trabou y pago di salario corespondiente na e trahado.

Dunado di trabou por pidi e trahado pa firma un documento caminda ta pone por escrito e acuerdo riba subsidio di salario? 

Si esaki ta posibel mirando cu compania mester por demostra cu e la yega na un acuerdo cu e trahado riba e subsidio di salario. Si trahado no ta sinti confortabel pa firma of den caso cu e kier busca un conseho huridico prome cu firma e documento e por pidi conseho na Departamento di Labor & Investigacion. Tuma contact cu nos na tel: 5237720 of manda un email na dao.arbeidsgeschillen@gmail.com. Pronto nos lo ta habri bek pa atende publico. 

Tene cuenta cu si un dunado di trabou no a aplica of no ta bin na remarca pa subsidio di salario e ta keda responsabel pa pago di salario na e trahado. Pa haci cambio na condicionnan laboral manera reduci e oranan di trabou y salario, e dunado di trabou y trahado mester yega na un acuerdo mutuo!

Pa mas informacion riba subsidio di salario por tuma contacto cu e Service Center di SVb via email loonsubsidie@svbaruba.org of via WhatsApp message 5272801.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options