Studiantenan di Universidad di Aruba a entrega resultado di encuesta tocante e potential di hofi escolar pa Aruba.

ORANJESTAD – Recientemente e studiantenan Taisha Henriquez y Zayliyah Danje a entrega e raport di e encuesta “Why are School Gardens an added value to Aruba’s Food Security and Children’s wellbeing?”

Gobierno di Aruba, tin como un di meta principal pa stimula e sector primario di Aruba. No solamente pa logra seguridad di cuminda pa e comunidad pero alabes brinda e oportunidad na nos hobennan pa bin mas den contacto cu e sector aki y conoce kico ta e contribucion cu esaki ta representa pa nos comunidad y futuro generacion.  

Presentacion resultado encuesta Santa Rosa “Why are School Gardens an added value to Aruba’s Food Security and Children’s wellbeing?”Na 2019 a inicia e proyecto “Hofi di Amistad” cu e meta pa crea hofinan escolar mediante un plan di mantencion diseña door di e studiantenan mes. Pa e proyecto aki tin dos scol cu ta formando parti di dje y cual ta haci posibel pa midi e desaroyo y exito di cada un individualmente. Asina poco poco por bay ahusta e modelo den e structura cu ta mas duradero y practico pa logra e meta principal y efectividad di cada hofi. Nos ta consciente cu den algun ocasion, tin scol cu kier tin nan propio hofi escolar, pero pa varios motibo ta dificil pa realisa esaki. Algun ehempel ta e gastonan di irrigacion of mantencion, como tambe e compromiso pa sigui mantene e hofi durante temporada di vakantie. Apesar di e dificultadnan, tin varios scol cu toch ta sigui purba pa crea un area chikito caminda cu e muchanan por por disfruta di un hofi.

Presentacion resultado encuesta Santa Rosa “Why are School Gardens an added value to Aruba’s Food Security and Children’s wellbeing?”Como parti di Santa Rosa su responsabilidad pa crea y ehecuta proyectonan cu tin un impacto educativo y pa logra concretisa e metanan pa cual a desaroya e proyecto. Un di e proyectonan cu Santa Rosa tabata desea di evalua pa asina por traha un plan di maneho mas concreto, ta e posibilidad di stimula mas hofi escolar rond di Aruba. Director di Santa Rosa, Sra. Nathalie Maduro a indica cu cada hofi escolar ta un herment educativo valioso. E ta sirbi pa conscientisa y stimula nos hobennan tocante e importancia pa un pais establece seguridad di alimento saludabel pa su comunidad. Tambe pa consider’e un carera profesional cu den futuro lo contribui enormemente na logra menos dependencia di importacion di cuminda for di exterior y crea oportunidad laboral.”

Na luna di maart 2022 Santa Rosa a entrega e tema di estudio na Universidad di Aruba como parti di un proyecto pa studiantenan por asisti cu ehecucion di estudio. A scoge dos studiante, Taisha Henriquez y Zayliyah Danje di e Facultad di Social Works pa hunto cu e gerencia di Santa Rosa inicia cu e estudio mediante un encuesta tocante e tema “Why are School Gardens an added value to Aruba’s Food Security and Children’s wellbeing?” E studiantenan a haya diferente informacion y dato pa na estudio y a bishita e dos proyectonan ya existente. Tambe a bishita otro instancia caminda den pasado Santa Rosa a coopera cu workshop y material di plantacion.

Poster encuesta Santa Rosa “Why are School Gardens an added value to Aruba’s Food Security and Children’s wellbeing?”Otro aspecto importante y interesante di e estudio ta, a encera un encuesta cu a manda pa docente, ex docente, mayor, profesional y e hefenan di departamento pa por a logra haya un bista mas amplio con e gruponan aki ta mira e efectividad di desaroya mas hofi escolar y ki impacto esakinan tin riba e mucha su salud y desaroyo. E resultado a mustra cu e cifranan cu tin un interes grandi di parti di parti di tanto e docente y mayornan y cu ta reconoce e beneficio di stimula e tema di plantacion di cuminda for di trempan cerca e muchanan. Sinembargo tin e limitacion financiero y compromiso pa mantencion di e hofi cual ta keda un contratiempo. Pero awor cu tin un bista mas cla conclui for di e resultado di e encuesta. Santa Rosa tin un bista mas concreto awor di e futuro di e proyecto aki y lo traha awor riba e posibel solucionnan pa haci di cada hofi escolar uno exitoso.

Mester remarca cu e studiantenan a crea un bunita poster informativo riba nan propio iniciativa cu ta ilustra e cinco caracteristicanan cu ta haci di un hofi escolar un herment beneficioso riba diferente area tanto social, nutricional y como tambe desaroyo propio cerca e muchanan.

Pa medio di esaki, Gerencia di Santa Rosa ta gradici Sra. Yolanda Richardson, Docente Module Introduction to Research Methology pa e Facultad di Arte y Cencia na Universidad di Aruba pa su cooperacion. Ta yama danki na e dos studiantenan, Taisha Henriquez y Zayliyah Danje cu den un forma hopi profesional y dedica a ehecuta e estudio aki y entrega e raport completa na sra. Maduro den presencia di sr. Ludwig Rasmijn, encarga cu proyectonan escolar.

Pa mas informacion por tuma contacto cu Departamento di Agricultura, Cria y Pesca (Santa Rosa) via 5858102 of via info@santarosa.aw.

“ Sostene nos cultura, practica Cria, Pesca y Agricultura”

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options