Stof di Sahara y su efecto riba bo salud

ORANJESTAD - Departamento Meteorologico di Aruba recientemente a saca un comunicado riba e fenomeno di naturalesa referi como “Sahara Dust” y con esaki lo afecta nos atmosfera.

E fenomeno aki no ta nada nobo, eta sosode na mas cu un ocasion pa aña na momento cu e stof di Sahara ta wordo transporta atraves di aire pa nos region. Segun Servicio Meteologico di Aruba e temporada aki e cantidad di stof den nos atmosfera ta hopi mas cu normal cu ta ocasiona cu e kehonan por ta mas severo

Cu yegada di e stof aki, nos por experencia aumento den keho relaciona cu malesa respiratorio. Esaki debi cu e aire ta consisti di hopi mas stof cu nos ta custumbra cune. Esnan cu ta sufri di malesanan respiratorio, manera bronkitis, alergie of sinus por presencia aumento den nan sintomanan manera dificultad pa hala rosea, presion den pecho, hopi tosamento, grawatamento di cuero y wowo. Stof di Sahara ta ocasiona tambe cu tempo ta bira mas calor pa cual motibo ta recomenda pa bebe mas likido durante dia pa tene e curpa hidrata.

Como Departamento di Salud Publico nos ta conseha tur persona cu ta sufri di un of otro malesa respiratorio pa percura pa tin nan medicamentonan na nan alcanse na tur momento y tuma esakinan manera dokter ta prescribi. Haci superficienan limpi mas frecuentemente como cu stof ta drenta cas, camber y oficina apesar cu esaki por ta cera. Evita di haci actividad fisico den aire liber den e dianan benidero y si tuma nota cu e sintomanan ta empeora, tuma contacto cu bo dokter di cas pa un consulta.

Stof di Sahara na Santa Cruz, Aruba

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options