Stof di Sahara y su efecto riba bo salud

E fenomeno aki no ta nada nobo, eta sosode na mas cu un ocasion pa aña na momento cu e stof di Sahara ta transporta atrabes di aire pa nos region. 

Cu yegada di e stof aki, nos por experencia aumento den kehonan relaciona cu malesanan respiratorio. Esaki debi cu e aire ta consisti di hopi mas stof cu nos ta custumbra cune. Esnan cu ta sufri di malesanan respiratorio manera broncitis, alergia of sinus por presencia aumento den nan sintomanan manera:

• dificultad pa hala rosea;
• presion den pecho;
• hopi tosamento;
• grawatamento di cuero y wowo.

Stof di Sahara ta ocasiona tambe cu tempo ta bira mas calor pa cual motibo ta recomenda pa bebe mas likido durante dia pa tene e curpa hidrata.

Como Departamento di Salud Publico nos ta conseha tur persona cu ta sufri di un of otro malesa respiratorio pa percura pa tin nan medicamentonan na nan alcanse na tur momento y tuma esaki nan manera dokter ta prescribi. Evita di haci actividad fisico den aire liber den e dianan benidero y si tuma nota cu e sintomanan ta empeora, tuma contacto cu bo dokter di cas pa un consulta.