Sra. Maybelline Arends-Croes ta ricibi premio Crioyo di Oro

Señora Arends-Croes a ricibi e reconocemento aki di Go Cultura Fundacion pa su gran aporte na nos cultura.

Tabatin presentacion di The Young Voices, Grupo Melange, Cesar Olarte, Erika Giel, Gloria Vega, Rocco Franken, Rachel Kraaijvanger, Edjean Semeleer y hopi sorpresa mas. E artistanan tabata acompaña pa un orkesta musical.

Prome Minister desde Hulanda via un video cu a pasa e anochi ameno aki, a manda palabranan di felicitacion y gradicimento na Maybelline Arends-Croes expresando:

“Mi kier felicita Juffrouw Maybelline pa tur e bunita logronan durante e trayecto di bo bida den e mundo di cultura na Aruba. Y mi ta gradici bo pa tur loke bo a haci y significa pa nos cultura. Mi a conoce Juffrouw Maybelline desde cu mi tawata bay Colegio Arubano. Y Juffrouw Maybelline a inspira mi hopi pa gusta y aprecia musica. Maybeline tawata tin un carera politico. Y como hende muhe den politica tambe a haci un impacto hopi grandi riba mi persona. Y asina Maybeline a inspira hopi mucha, hoben y adulto den su trayectoria. Cu Dios bendiciona bo y cu bo por goza di e bunita reconocimento aki y cu bo por sigui deleita nos cu bo talentonan cu Dios a duna bo”.

Prome Minister ta gradici tur esnan cu a haci e evento di reconocimento aki pa señora Maybelline Arends-Croes posibel. Danki na Go Cultura Fundacion pa otorga señora Maybelline Arends-Croes cu e premio Crioyo di Oro.