Siman di training di Scol Saludabel Aruba

Poco poco mas y mas scol preparatorio y basico ta interesa pa bira un Scol Saludabel. E proceso pa bira un Scol Saludabel ta encera entre otro guia di un consehero di Scol Saludabel (Gezonde School Adviseur). Aruba tin actualmente 4 consehero di Scol Saludabel cu a haya training na Hulanda na 2016. Debi na e interes creciente pa bira un Scol Saludabel, e cantidad di consehero di Scol Saludabel lo no ta suficiente. Pa e motibo aki Scol Saludabel Aruba a scoge pa trece 2 profesional di Hulanda, señora Monique Boonekamp y señora Muriel Weltens, pa asina por train mas consehero di Scol Saludabel. Tur dos professional aki ta Consehero di Scol Saludabel na Hulanda. Mirando e oportunidad unico aki a dicidi di inclui e training di coordinador di Scol Saludabel.. E coordinador di Scol Saludabel ta miembro di e team di salud di e scol cu ta traha pa e scol por bira un Scol Saludabel. Su tarea ta organisa, sostene y coordina tur loke ta trata Scol Saludabel na su scol.

Dialuna 25 di november mainta a cuminsa cu un presentacion pa minister y director y/of representante di e instancianan cu ta directamente envolvi cu Scol Saludabel Aruba. A conta cu presencia di Minister di Enseñansa, Ciencia y Desaroyo Sostenibel, Sr. dr. Armando Lampe y Minister di Asunto Social y Labor, Sr. Glenbert Croes. Ademas tabata presente e director y/of representante di Departamento di Salud Publico, Departamento di Enseñansa, Departamento di Asunto Social, Instituto Pedagogico Arubano y Instituto Biba Saludabel y Activo. E representantenan  di 3 schoolbesturen, SKOA, SPCOA, DPS y representante di Dienst Inspectie tambe a asisti na e presentacion.