E tayer tabata pa tur (pre-) pensionado cu ta desea di uza nan carera y experiencia di bida den nan mesun negoshi.
E siguiente oradornan na, un manera profesional, a presenta e siguiente topiconan informativo y interesante:
- Sr. Dave Martinus, Certified Business Coach di ActionCOACH, a presenta ‘Kico ta encera entrepreneurship’. Su enfoke tabata cu si bo kier ta un comerciante profitabel bo tin cu corda pa traha ‘ariba’ bo negoshi y no solamente ‘den’ bo negoshi. Un formula cu Sr. Martinus a presenta tabata: DREAMS x GOALS x LEARN x PLAN x ACTIONS = RESULT. Sr. Dave a presenta hopi tópico interesante y a demostra di ta un tremendo coach;
Sr. Marc Croes, Policy Advisor na Departamento di Asuntonan Economico; a conscientisa e participantenan di e 17 metanan di Desaroyo Sostenibel (Sustainable Development Goals – SDG’s) y despues el a enfatisa riba 3 di e metanan aki cu un negoshi por aplica pa contribui na un desaroyo sostenibel. E tres metanan ta: Meta no. 8: ‘Decent Work and Economic Growth’, meta no. 10: ‘Reduced Inequalities’, y meta no. 12: ‘Responsible Consumption and Production’. Siguientemente Srta. Mileidy Gonzales, Stagiare di Universidad di Aruba (UA), a presenta accionnan cu un compania por tuma pa contribui na e metanan aki y a termina e parti aki cu un ehercicio y dos grupo a haya e oportunidad pa presenta nan ‘Business Action’ na e grupo completo;
- Notaris Johnson; a presenta e temanan: bedrijfsvormen (eenmanszaak/ NV/ VBA), bedrijfsopvolgingen (diferencia den companianan) ora cu bo lo kier cuminsa un negoshi y tambe a presenta tocante testamenten/ nalatenschap (kico por laga atras y pa ken). Durante e presentacion di notaris Johnson, a bin hopi pregunta dilanti, cu e notaris a contesta cu hopi claridad;
- Sra. Mary Baarh hoofd di e afdeling di Vestiging van Bedrijven na DEZHI, a elabora riba e permiso y ley pa establecimento di negoshi, definicion di un negoshi, liña di maneho di gobierno, procedura pa introduci un peticion, gastonan pa aplica pa un permiso etc.;
- Sra. Louella Croes-Ras, Policy & Business Advisor di IDEA, a elabora riba tur nan servicio y training/ curso cu IDEA ta ofrece desde 2012, na esnan cu ta desea di habri un negoshi of ya ta operando un negoshi. A recomenda tur presenta pa like e Facebook page “Idea-Aruba”, pa asina keda informa di IDEA su actividadnan, a duna un par di tips pa ora di start un negoshi, na unda tur mester registra un negoshi y tambe na final a presenta proyectonan cu IDEA tin riba schedule pa 2019;
- Sr. Benny Richardson tabata tremendo. Sr. Richardson ta un Training Coach. Un meneer di 80 plus, curpa bon teni y fisicamente hopi saludabel a bin cu su presentacion y a inspira y conscientisa tur presente tocante nan estilo di bida, comemento saludabel y movemento, cu ta e secreto pa keda den un forma saludabel. Sea mentalmente bon prepara pa ta un bon comerciante, y haci loke bo ta gusta tabata algun tips cu Sr. Richardson a trece pa dilanti.
- Sr. Kenneth Faustin, Broker na Best Buy Aruba y un Certified Auctioneer, a splica cu un pensionado tin ‘experiencia di bida, tin hopi conocemento general, tin basta amistad, famia y tin conocemento specialisa. Tambe tin Hopi mas tempo!!’. Tur esaki ta un bon motibo pa bay den Real Estate na e edad aki, door di e flexibilidad den horario di trabao, e ta yuda e persona keda fisicamente y mentalmente activo, ta un entrada extra y lo siñ’abo uza technologia moderno. Sr. Faustin tambe a elabora riba e 3 cualidadnan pa desaroya pa tin exito den Real Estate (1. Un actitud mental positivo, 2. Traha cu metanan scirbi, 3. Sea Auto-motiva;
Sra. Ivy Guerrero, Sr. Gino Croes y Sra. Marieta Tromp di SVB a duna hopi informacion valioso na tur presente tocante e primanan social pa un dunado di trabao y e trahado. SVB a enfoca cu tur empleado mester ta inscribi y tambe paga premie ya for di su prome dia di trabao. E premie di cada empleado ta calcula abase di ki tipo di trabao e persona ta eherce. Un cos ta sigur den opinion di SVB, pa no tuma riesgo, inscribi bo mes como negoshi, paga bo premie y evita boet;
- Sra. Tamarah Arends-Croes, Business Electronic Sales Specialist na RBC Royal Bank, a elabora riba varios servicio cu RBC Royal Bank sa ofrece manera: procedura pa habri un account, productonan (Business Account, Online Banking, Debit Card, Night Deposit), servicionan manera ‘card acceptance, fast payment 1-3 seconds, portable devices and E-Commerce’, innovacion manera ‘wired and wireless point-of-sale (POS)’.
- Sr. Ulrich Hermans y Francois Croes, Innovation Advisors di Futura, a presenta dos topico: ‘Future of Work’ y ‘Design Thinking’ special pa pensionadonan. Pa medio di un ehercicio di analisis a laga e futuro negociantenan analisa problemanan cu lo por haya den nan trayectoria;
- Sr. Ludwig Rasmijn y Sr. Randy Maduro di Santa Rosa, a elabora tocante posibilidadnan pa bira un Agripreneur. Temanan cu a bin dilanti durante nan presentacion tabata tocante aquaponics, productonan local, hofi chikto, matanan chikito, con pa baha gastonan, con bo por haci di bo hobby un negoshi, con un pensionado por beneficia di su hofi of cunucu y a mustra diferente agripreneurnan exitoso riba nos isla etc.;
- Sra. Cindy Clark, Managing Director di Accura Tax Consultancy, a elabora riba impuestonan relevante pa un entrepreneur.
- Srta. Merienys Frances di SETAR N.V., a elabora riba e importancia di ‘Digital Marketing’. A duna tips efectivo con pa promove bo negoshi via social media manera Facebook, Instagram y Google Search. Tambe a elabora riba Direct Email. Na final di dia a cera cu un wega interactivo online pa repasa tur loke a splica y a parti un regalo cu tur presente a aprecia.
Tabata tin tambe intercambio di experiencia di:
- Sr. Lionel Rumnit, kende ta specialisa como Job Coach na ‘Trampolin pa Trabao’, y a conta, con e ta train e personanan cu desabilidad pa den futuro por dentra den mercado laboral den nos sociedad. Sigur un trabao hopi bunita, cu ta un ehempel di ‘Social Entrepreneurship’;
- Sra. Rosa Alberto, propietario di Ginger Aruba Rosken, kende a cuminsa su negoshi ora e la drenta su edad di pensioen;
- Sr. Loui Richardson propietario di Invest Secure; a conta con e ta continuando cu su negoshi desde cu e a drenta su edad di pension. Cu respet uno ta logra hopi den nan negoshi;
- Sr. Merrill Robles (un pensionado), a conta con e a yuda comunidad pa medio di su negoshi y pafor di su negoshi. Sr. Robles a comparti hopi tips na e grupo di participantenan.
Un total di 34 persona a participa den e tayer aki y a ricibi e ultimo dia di e tayer un ‘certificado di participacion’, cu minister Sra. Mr. Xiomara Ruiz- Maduro a entrega.
Idea ta sumamente contento cu e contenido y acogida di e tayer y tambe di e bon comentarionan ricibi di su participantenan. Un tayer sigur hopi interactivo y un tremendo presentacion di parti di tur e oradornan.
Tambe IDEA kier remarka cu nan tayernan ta gratis y ta dedica na un y tur cu kier cuminsa un negoshi of tin un negoshi existente y kier educa nan mes riba diferente topico comercial.
Un danki na tur participante y un danki special na tur presentador cu a comparti nan experticio cu tur esnan presente.
Por sigui nos riba Facebook page @Idea-Aruba pa mas tayer y otro actividadnan di IDEA den futuro.
Share this page