Servicio Meteorologico di Aruba cu alerta pa calor excesivo

Door di un combinacion di temperatura halto (33 pa 36 grado celsius) y e porcentahenan generalmente halto di humedad (mas halto cu 70%) ademas di un biento zwak durante e proximo dianan, e sensacion di calor lo por yega 38 pa 42 grado celsius.

E calor y humedad halto lo no baha mucho anochi cu temperatura bahando solamente te un minimo di 29 te 27°c grado. Esaki lo aumenta e peligro pa e hendenan cu no por haya un lugar adecua pa refresca nan curpa. 

Nos ta den e temporada di mas calor di aña

Calor excesivo ta e asesino di tempo nr. 1. Hende mester ta prepara pa e peliger cu calor excesivo ta ocasiona. Mucha chikito, hende grandi y hende cu malo di curason ta esnan mas exponi.

Limita actividad pafo di cas pa e oranan trempan di mainta of ora solo baha; ta recomenda pa entre di 11’or di mainta y 4’or di atardi limita e actividadnan pafo di cas of cu otro palabra den solo. Si bo tin un airco cu ta funciona, uz’e of a lo menos habri bentana pa laga aire pasa y circula. Bebe hopi likido, keda den camber cu airco. Keda aleha for di solo. Ora bo sali pafo bisti paña di color licht; no uza paña scur, ya cu esaki ta retene mas calor y ademas bebe hopi likido, preferiblemente  awa y juice sin sucu.

 Conseho Departamento di Salud Publico pa tuma medida di precaucion durante temperada di calor

Calor por ocasiona deshidratacion, zonontsteking, presion halto, dolor di cabes, cansancio, biramento di cabes y stoma, sacamento, cram di musculo y hasta ataca cerca un persona cu ta den e temperatura cayente pa un tempo largo.

Departamento di Salud Publico ta conseha comunidad pa durante e dianan cu ta sigui pa:

• bebe hopi awa por lo menos 2 liter pa dia;
• uza protector solar SPF 30 of mas;
• bisti bril di solo, pechi of sombre;
• uza paña di color cla preferibel di catuna of linen;
• evita bebida cayente y bebidanan cu ta contene cafeina of hopi sucu durante e oranan mas calor cu ta entre 11:00 di merdia pa 2:00 di atardi.

Nos muchanan, enfermonan y nos hende grandinan ta esnan mas vulnerabel pa e calor aki. Ta hopi importante pa vigilanan constantemente y refresca nan curpa pa wanta e temperatura abou y hidrata nan cu suficiente likido.