Serlimar ta sali di ‘surseance van betaling’

ORANJESTAD - Despues cu 3 aña pasa, hues a duna Serlimar un "Surseance van betaling" esta un posponemento di pago, awo Serlimar ta sali di e surseance van betaling y por sigui desaroya como compania.

Tabata obvio cu Serlimar no por paga e debe astronomico di 20 miyon florin. Riba 8 di mei 2020 e Raad van Toezicht y Gerencia di Serlimar a pidi ‘surseance van betaling ‘pa evita cu mester declara bancarota. Na 19 di mei 2020 corte a aproba un surseance temporario. Na april 2022, a nombra un Raad van Toezicht nobo y a traves di esfuersonan durante e ultimo aña a logra convence hues pa extende e surseance van betaling dia 20 di mei 2022.

Reunion tocante salimento di  ‘surseance van betaling’ di Serlimar. A logra presupuesta fondo pa paga creditornan y mester a ahusta e tarifa di Serlimar, y a reinforsa esfuersonan di coleccion di tarifa, asina fortificando e compania su posicion financiero. A introduci un software pa yuda cu pago y cobransa y a reorganisa e contratistanan cu a pasa di DOW na Serlimar na aña 2015, sin presupuesto, cu a causa impacto financiero severo pa Serlimar.

Cu e plan “Nos Tera Nos Pais”, a logra realoca e ploegnan na bienestar di Naturalesa y Agricultura, bou di Directie Natuur en Milieu (DNM) y Fundacion Parke Nacional Arikok (FPNA), Bureau City Inspector (BCI) y Santa Rosa cual a yuda reduci gasto di Serlimar.

Riba 28 di augustus 2023, Serlimar a sali di su ‘surseance van betaling’ y por cuminsa tuma decisionnan riba su mes. Esaki ta nifica cu e compania a mustra bon señal di ta recuperando y cu ta riba bon caminda pa sali di tur su debenan. Awor, Serlimar tin e oportunidad pa por reinventa su mes y sigui desaroya como compania.

Gobierno ta trahando riba e posicion di e trahadonan cu ainda ta den espera di sea periodiek, bevordering y of conversacionnan di funcionamento. Ta importante pa e situacion di trahadonan keda regla, pa asina por tene tambe motivacion di trahadonan halto. Awor Serlimar tin espacio pa planea con pa posiciona su mes riba e mercado di procesamento di desperdicio den forma sostenibel.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options