Seminario “Honra Bo Compromiso Cu Integridad” a cuminsa

Den cuadro di esaki, Gobierno di Aruba, y su Ministerio di Integridad  ta decreta e siman di 5 pa 9 di december como Siman Nacional di Integridad.  

"Honra bo compromiso cu integridad" ta e tema principal pa e siman aki.  

Den cuadro cu e siman di conscientisacion, a organisa diferente seminario encuanto integridad y bon gobernacion.

Diamars 6 di december tabata tin e prome (parti) encuentro, organisa pa e ministerionan mes. Aki diferente coleganan di diferente ministerio tabata t’ey presente pa atende e seminario educativo. Siguientemente e seminario lo ser duna na e ministernan tambe. 

“Conscientisacion ta sumamente importante, y ta e enfoke number 1 pa e siman aki. Mester recorda un y tur riba e importancia di prevencion, e lucha contra corupcion y pa promove integridad na nos pais”, minister Arends ta subraya. 

Cambio ta cuminsa na educacion, pues e siman aki tambe lo tin bishita na algun scol pa toca e tema di integridad riba e nivel di mas basico cu tin. “Mester invulcra nos hobennen tambe den e combersacion, pa nan tambe por compronde “Kico Ta Integridad” y “Con Por Beneficia Di un Aruba Mas Integro”, minister Arends ta remarca.

Minister Ursell Arends, hunto cu Gobierno di Aruba y tur stakeholders tin como meta pa yega na un Aruba resiliente, sin corupcion y integro. Pa logra e meta aki tur persona cu ta traha, uza of ta depende di e sistema, mester ta consciente di nan responsabilidad- y debernan – como trahador of ciudadano – pa preveni, y no participa na actonan cu ta “cheat the system”.