Cu e habilidad cu e participante ta haya na e Agri Business Academy, ta sigui promove metodonan moderno di agricultura pa mehora nos posicion di siguridad di alimentacion.
A crea un fondo yama "Agri Fund" pa facilita financiamento di proyectonan agricola na un interes atractivo, pa stimula y sostene mas (futuro) empresario den e sector di agricultura di Aruba.
E sector di agricultura tin e potencial di bira un sector economico importante cu por contribui na e diversificacion di nos economia. Minister di Asunto Economico, Comunicacion y Desaroyo Sostenibel, Sr. Geoffrey Wever hunto cu Minister di Transporte, Integridad, Naturalesa y Asunto di Adulto Mayor, Sr. Ursell Arends, conhuntamente cu Qredits Aruba a organisa e prome Agri Business Academy riba 24 di januari ultimo y awor a inicia cu e di dos programa.
Agri Business Academy ta un programa desaroya door di Qredits Aruba specialmente pa e sector di Agricultura, cu un duracion di 12-14 siman, cu ta brinda e material esencial pa crea bo propio Plan di Negoshi y Plan Financiero. E programa lo finalisa cu un “Pitch” unda cada partcipante lo haya oportunidad pa presenta nan producto/servicio.
Meta di Agri Business Academy ta pa yuda empresarionan yega na nan meta door di ofrece nan e herment necesario, cu ta conocemento, pa cuminsa of sigui opera un negoshi exitosamente den e sector di agricultura.
Minister Geoffrey Wever y Minister Ursell Arends ta desea cada participante exito cu e trayecto aki y ta gradici Qredits Aruba pa e bon cooperacion di semper.
Share this page